Субверзивните колажи и везови на Хозе Ромуси

Чилеанскиот уметник Хозе Ромуси создава комплексни колажи направени со вметнување на везови на фотографски портрети. Во својата најнова серија Anti-Serie, сликите претставуваат модни портрети кои на прв поглед изгледаат како да биле начкртани со маркери.

Всушност, зборовите и цртежите се извезени со мулти-колоритни конци, медиумот кој Ромуси го преферира за „да ги спои различните временски простори“. Во една изјава, за неговата уметност Ромуси вели:
„Мојата интервенција се сведува на внесување на нови елементи во веќе постојаната слика, со користење на сопствена перцепција за убавината. На тој начин се обидувам да ѝ дадам нов идентитет или различен естетски концепт, а тоа значи дека сликата добива нова емоција, нов живот, нова интерпретација на убавината преку везот.

Интензивните бои и фините линеарни теми создаваат нови енергии, нагласувајќи ги линиите и движењата на одминатото време. Во друга прилика, Ромуси вели:
„Мојата работа е постојана потрага по можност да ги изразам и претставам моите идеи. Знам дека има нешто повеќе од она што е видливо и опипливо и не мислам дека сè е веќе направено. Затоа, постојано истражувам и откривам нови техники и материјали. Сакам да им дадам нова перспектива на нештата кои веќе постојат и да му дадам еден момент во сегашноста на сето она што е веќе заборавено. Заинтересиран сум за спојување на шевовите на минатото и сегашноста. Според мене, сите површини се проодни“.

Извор:www.ignant.de