Боли глава

Оваа земја по независноста требаше и можеше да биде една балканска ѓулбавча, а благодарение на сите власти до една, и на левиот Ојле и на десниот Дојле се претвори во транзициска „Казабланка“ на 21. век.

Томислав Османли, писател, „Дневник“, 30.11.09

Треба да ги ослободиме нашите умови од македонскиот национализам, кој не е својствен само за владејачката партија, туку е во срцата и душите на Македонците и на многу други партии. Треба ревизија на идејата за поделена татковина која, за разлика од сега, некогаш кога во војни се цртале и прецртувале граници и имала реална основа да биде остварена. Негувањето на таквиот национализам денес е само една обична манипулација со луѓето и рецепт за судир, не само со Грците туку и со сите народи во Европа. Почетен чекор кон таа националистичка деконтаминација нека биде националистичката партија да даде пример и да го смени името ВМРО. Со тие зборови извадени од историјата предолго се манипулира со чувствата на Македонците. Мене кованицата ВМРО денес ми изгледа како балсамирано тело ставено во ковчег пред кое луѓето во страв се поклонуваат. За нашите гласови треба да се натпреваруваат модерни партии - конзервативна, социјалдемократска, либерална, селанска... Дали е можно? На крајот, ако сакаме да не прифатат во Европа, тоа ќе мора да се случи - деконтаминација на македонското општество од митологии што нè вознемируваат и нас и соседите.

Денко Малески, „Дневник“, 21.11.09

Ние не го изгубивме патријархот Павле, туку добивме уште еден застапник и молител пред Господ. И тоа таков кој претставува собирно сечило на сите Срби, кои неволно се посеани од Господа овде и насекаде....

Богољуб Шијаковиќ, e-novine, 18.11.09

Има печатени медиуми кои велат дека државата и црквата се одвоени едни од други. Така стои во уставот, така вели и законот за правна положба и црква. А јас ќе кажам: а што ќе беше ако не беше македонската православна црква? Затоа ветувам како државен орган дека се што ќе биде активност на МПЦ државата ќе стои зад неа.

Валентина Божиновска, претседател на Комисијата за верски заедници, 12.11.09

Денес дојде време да имаме нешто што би го дефинирале како „smart power“. Тоа го покажа нашиот регион. Направете само една обична анализа и ќе видите дека претседателот на Словенија е доктор на науки, претседателот на Албанија е доктор на науки, претседателот на Србија е доктор на науки, претседателот на Бугарија е доктор на науки, а и јас сум доктор на науки.

Ѓорѓе Иванов, Утрински весник,11.11.09

Сите анализи се направени, ништо друго и попаментно не остана да се каже. Останува медицинското и педагошко прашање: Како да му се пријде? Како да му влезе (тоа сознание дека токму тој ќе го смени името), а тој да се почувствува горд од тоа? Како дршката од метлата на меѓународниот притисок да му навлезе, а тој да се почувствува „гордо исправен“ од тоа, имено да стои простум пред непокорот на македонскиот народ.

Љубомир Д. Фрчкоски, „Дневник“, 10.11.09