1007 hPa
93 %
7 °C
Скопје - Саб, 27.04.2024 03:59
Традиционалниот шведски празник Санта Луција во Шведска се одбележува во знакот на светлината во темните и долги зимски ноќи, а Амбасадата на Шведска на 13 декември го прослави во Скопје со концерт на празнични песни и шведски кулинарски специјалитети.
Гостите во Македонска филхармонија беа пречекани со мирис на глог - варено вино со бадеми и суво грозје и колачиња со шафран и ѓумбир на прославата на оваа уникатно шведска традиција - фестивал на светлината и топлината кога скандинавските ноќи се најтемни, а зимата најстудена.
Свечениот концерт беше исполнет со божиќни песни, традиционални шведски песни за Луција како и класични композиции. Настапи женскиот хор „Св. Злата Мегленска“ под диригентската палка на Летка Димовска – Полизова. На сцената им се придружија и оперските пејачки Билјана Стафансон и Лилјана Јовановиќ Миловановиќ, придружени од Иван Еминовиќ на пијано и камерниот состав „Пламенка Трајковска “.
Амбасадорот на Шведска, Матс Стафансон, ја поздрави публиката и го потенцираше значењето на еден од најголемите празници во Шведска, кој се прославува насекаде низ земјата, во домови, училишта и на работни места. Речиси и да не постои шведска амбасада низ светот која не организира прослава за Санта Луција.
Денешниот начин на прославување има традиција од еден век, главниот лик е Луција – светлоносец кој внесува топлина, светлина и надеж во домовите и срцата на луѓето.