Боли глава

Настрана опседнатоста со Alte Balkanische Kitsch на архитектонска мегаломанија и коњокласицизмот како потсвесна метафора за јавнатиот народ, новоапсолутистите и не се одликуваат со некоја посебна мас-културна иконографија. Се' што е способна оваа авторитарна власт да измисли се периодичните спин-оф верзии на црнокошулаштво, трапаво пропагирање на конрададенауровски постнационалсоцијализам и медиумските гебелси во криза на идентитет помеѓу Африм и Борат. Во пакет со јужно тажни копии на домашниот Вагнер-болшевизам во ликот на грст скржави млади студенти облечени како антички Александар и Хефастион и нивните партизански наследници Мирко и Славко.

Арсим Зеколи, „Утрински весник“, 02.09.12.

Новинарот: Велите Македонија е рај за инвестиции, ниски даноци, договори со сите земји на европскиот континент, што тогаш Канада може да ви понуди вам?
Груевски: Имаме големи инвеститори, познати брендови од Германија, Америка, Британија, Русија…. но немаме од Канада. Затоа сме тука.

Никола Груевски, интервју за канадската BNN; 30.08.12.

Зна­ев дека половина од СДСМ-овците се на привремена работа во ВМРО-ДПМНЕ. Ама се от­кри дека барем еден ВМРО-вец е на привремена работа во СДСМ. Се вика Зоран За­ев. Гради цркви и плаќа српски турбофолкерки.

Горан Михајловски, „Вест“, 25.08.12.

Во златна Македонија Александар по 2.500 години го направи најуспешниот поход. Ги помири мајка му Олимпија и татко му Филип кои биле закрвени до смрт. Ене ги сите тројца, фатени за раце, седат на Фонтана.
Горан МИХАЈЛОВСКИ, „Вест“, 18.08.12.

Појдете во Свети Николе или во Струга ако сакате во живо да се уверите дека таму кај што минува преродбата - Македонецот исчезнува како екваторски пеликан во нафтна дамка. Декадентната атмосфера што ја шири нискокорумпираната проста маса, фасцинирана од скопските кафулиња и ресторани и од шансата да го отвора денот со гел на косата и жолто на гаќите, таа, значи, маса од стотина илјади корисници на идиотскиот систем на вемеровското вработување со помош на нискиот мозочен притисок, тоа е многу важен знак за постепеното но сигурно исчезнување на Македонецот од светската зоолошка картографија: принципите на еволуцијата покажуваат дека охридската пастрмка поскоро ќе добие Македонец за ручек во Трпеица, отколку обратно.

Бранко Тричковски, „Глобус“, 22.08.12.

Кога за време на војната во Босна беше објавено дека рускиот националист Владимир Жириновски ќе го посети лидерот на босанските Срби Радован Караџиќ, британскиот весник „Гардијан“ таа вест ја објави на насловнaта страницa на следниот начин: „Има една добра и една лоша вест. Добрата вест е што Жириновски, конечно, решил да се јави на психијатар. А лошата вест е што психијатарот се вика Радован Караџиќ“. Се сетив на овој англиски цинизам кога прочитав деновиве дека Антонио Милошоски од партијата ВМРО-ДПМНЕ од Македонија, позната по одржувањето „фер“ избори, ќе биде шеф на мисијата на ОБСЕ-ОДИХР за набљудување на парламентарните избори кај Александар Лукашенко во Белорусија, што ќе се одржат на 23 септември оваа година.
Ѓорѓи Спасов, „Утрински весник“, 18.08.12.