Waves of Ambience #2

Waves of Ambience #2 е годишна прослава на експериментално-амбиентални музички и аудитивни/ визуелни медитации, како мал „DIY“ фестивал организиран од www.ampeff.com

Фестивалот ќе се одржи на две локации во Скопје, почнувајќи во Социјалниот центар Дуња на 16-ти и на 17-ти февруари, со артисти од Македонија и од Малта, а завршувајќи на 20-ти февруари во Ла Кања.

За оваа година се најавени: Amplidyne Effect, Vedis, Likvidator, Robert Farrugia, Post Global Trio, Brotherhood of Dada и Квартетот Омерагиќ/ Георгиевски/ Спировски/ Мартиновски.

16-ти февруари во Социјален центар Дуња (Почеток 20:00)

Robert Farrugia [Моста, Малта] (LIVE)

Роберт Фаругиа е амбиентален/ експериментален/ неокласичен артист од Малта, кој има издадено за музички етикети како Assembly Field, Whitelabrecs и со поново издание за шпанската етикета Archives. Иако неговите порани изданија се базирани на поекспериментален гитарски звук, Роберт е класично образован пијанист и се фокусира на пијано записи од 2013 година. Како негови главни влијанија ги има цитирано артистите Olafur Arnalds, Stars of the Lid и Taylor Deupree. Музиката на Роберт обично започнува со мали мотиви, кои се поставени во главно импровизациски пристап.

https://robertfarrugia.bandcamp.com/

Post Global Trio [Скопје + Битола, МК] (LIVE)

Post Global Trio е проект на Тони Димитров, Димитар Додовски и Мартин Георгиевски, настанат како континуитет на одредена комуникација, соработка и како нужност за развивање на одредена сцена. Mузиката на Post Global Trio е сочинета од теренски снимки, суптилни делници и текстури и незабележливи репетитивни ритми кои резонираат некаде помеѓу апстракцијата и нарацијата, оставајќи ве без здив со својот звучен тек. Вметнатиот медитативен амбиент и теренските звуци ве носат низ имагинарни пејзажи, раскажувајќи приказна за чувствата и за природата. Нивните настапи се искуство кое може да се почувствува на патување низ далечните територии на македонските планини каде што се снимени користените теренски снимки, давајќи јасни слики на суптилните звучни пејзажи.

Мартин Георгиевски – сајзер, разни инструменти
Димитар Додовски – електроника
Тони Димитров – теренски снимки

https://shimmeringmoodsrecords.bandcamp.com/album/minus-seven

17-ти февруари во Социјален центар Дуња (Почеток 20:00)

Brotherhood of Dada [Скопје, MK] (LIVE)

Brotherhood of Dada е музички проект без константна постава.

Под тоа име досега имаат објавено само еден музички колаж со наслов Sekai, достапен на YouTube.

Исток Ј. Улчар е наводно писател и сигурно сечач/лепач/монтирач на звучни колажи.

Исток Ј. Улчар – глас
Ива Дамјановски – теремин
Константин Хаџи Коцев – јазичен тапан (tongue drum, азиска перкусија).

https://www.youtube.com/watch?v=lp5W0fCJCtM

Омерагиќ + Георгиевски + Спировски + Мартиновски [Скопје, МК] (LIVE)

Импровизаторски експериментален квартет на Дени Омерагиќ (контрабас), Нинослав Спировски (кларинет, саксофон), Мартин Георгиевски (електроника, гитара) и Владимир Мартиновски (тамбура, кавал, удиралки).

20-ти февруари во Ла Кања (Почеток 21:00)

Vedis [Скопје, MK] (DJ SET)

Vedis – holy spirit of the forest, е синематичниот амбиент проект на Klara, мултимедијален артист од Скопје, која на електронската музичка сцена работи како продуцент, DJ, вокалист и live изведувач. Vedis како проект постои од март 2017 година, и цели кон трансмисија на разни искуства и приказни инспирирани од природата, од космичките сили и од ведските списи преку: звук, вибрација, фреквенција. Нејзиниот звук може да се опише како длабок, сензационален, меланхоличен и спиритуален, звук искажан преку долги drone сесии, класични и атмосферски вокали, теренски снимки, долги филмски атмосфери и пејсажи, и користи различни акустични, аналогни и дигитални инструменти.

https://soundcloud.com/vedis_klara

Amplidyne Effect [Скопје, MK] (DJ SET)

Amplidyne Effect e мултимедиjален проект изведен од продуцентот, музичар и графички дизајнер Мартин Георгиевски (р. 1988 во Скопје, Македонија). Заземајќи форма на импровизиран музички проект, а под влијаније на експерименталниот/ психоделичниот спектар на звуци како drone, noise, ambient, contemporary minimalism па до пост-рок, краут рок и IDM елементи, тој својата инспирација ја црпи од: уметноста, музиката, филмот, природата и самата технологијата

https://www.mixcloud.com/amplidyneeffect/

Likvidator [Скопје, MK] (DJ SET)

Likvidator е името зад продуцентот Андријан Апостолоски од Скопје. Неговата музика може да се опише во јадрото како индустриски dub со мрачни дисориентирачки пејзажи, инспирирани од ритамот на трип-хопот со доза неправилности и мрачен амбиент во најдлабоките подрачја на звучниот спектар.

https://soundcloud.com/likvidatordub

Влезот на сите настани е со донација за артистите.