Повторно отворање на Музејот на вагината во Лондон

По затворањето на почетокот на годината, Музејот на вагината во Лондон ќе биде повторно отворен со изложбата насловена „Ендометриоза: во непознатото“.

Првиот музеј од ваков тип во светот беше принуден да се затвори кога во февруари беше побарано да ги ослободи своите простории на плоштадот Викторија Парк, во Бетнал Грин, источен Лондон.

Откако најде нов дом на блиската улица Појзер, Музејот на вагината наскоро повторно се отвора.

Оваа пролет, музејот започна апел за собирање средства за новите простории. Со таа акција за три недели доби 85 000 фунти, речиси 98 000 евра, од повеќе од 2 500 поединци.

Изложбата со наслов „Ендометриоза: во непознатото” има за цел да ги едуцира луѓето за основите на ендометриозата, како и да ги информира за најновите истражувања.

Од музејот велат дека ќе ги отфрлат митовите, но и ќе ги сослушаат жените кои живеат со оваа состојба, која предизвикува клетките слични на слузницата на матката да се најдат во други делови од телото. Тоа предизвикува исцрпувачка болка, особено за време на менструацијата и може да влијае на шансите на жената да забремени.

Во моментов не постои единствен третман, но начините за ублажување на симптомите може да вклучуваат силни лекови против болки, хормонски апчиња за контрацепција и операција за отстранување на проблемот со преголемата матка.

Според добротворната организација Ендометриоза ВБ, околу еден и пол милион жени во Велика Британија во моментов живеат со оваа состојба.

Извор: https://bizlife.rs/