Предновогодишна фузија: промоција на три книги

На 26 декември 2023 година, со почеток во 19 часот, во PrivatePrint Studio во Скопје, ќе се одржи настанот „Предновогодишна фузија: промоција на три книги“. Ќе бидат промовиранит три книги во издание на студиото во рамки на активностите поддржани од фондацијата Принц Клаус од Амстердам. „Raw Breathing – Traveling through rockscapes“ од Христина Крстеска, „Croprising: Bad Gardeners & Good Weeds – A Guide“ од Хана Корнети и Ивана Чалоска во соработка со Димитар Самарџиев и „She, Time Machine“ од Викторија Мачковска.

Книгите се реализирани во текот на 2023 година, како трите одбрани предлози на  отворен повик за соработка на интердисциплинарен издавачки проект. Книгите ќе бидат промовирани со разговор со авторите.

Извонредно документираната книга „Raw Breathing – Traveling through rockscapes” на Христина Крстеска нѐ води на патување низ различни карпести формации кои, со текот на времето, претрпеле промени и станале светилишта, места на суеверие или рудници за немилосрдна експлоатација. Во рамките на книгата, Христина навлегува длабоко во сложеноста на симбиозата човек-природа, откривајќи ги нејзините слоеви на меѓузависност и предизвиците што ги наложува. Книгата претставува беспрекорен спој меѓу нејзиниот извонреден фотографски дневник и разговорите со геологот Игор Пешевски и археологот Дамјан Донев.

„Croprising: Bad Gardeners and Good Weeds – A Guide“ е еклектична збирка фикција, илустрации и разновидни истражувачки и документарни текстови, кои поаѓаат од искуствата, знаењето и активностите на градинарите од општествената градина „Бостание“ во Скопје. Хана Корнети (писателка) и Ивана Чалоска (илустраторка), во соработка со Димитар Самарџиев, претставник на градината, ги здружија силите во овој соработнички и интердисциплинарен проект, за да ја споделат приказната на општествената градина изградена на принципите на пермакултурата и приказната на заедницата околу неа, којашто инспирира промени на индивидуално ниво.

„She, Time Machine“ на Викторија Мачковска е примамлива фотографска книга која ја пренесува мистичноста на ретките неолитски фигурини преку разновидни фотографски методи и во која е испреплетена повеќеслојна феминистичка перспектива. Фотографиите се надополнети со есеи од Мачковска и од литванската историчарка на родот Раса Навицкаите и оваа соработка ја продлабочува приказната, правејќи ја книгата визуелно и интелектуално патување. Таа ги насочува читателите да ги промислат пораките коишто овие дамнешни претстави за женственоста можат да ни ги пренесат денес.

Извор: https://privateprint.mk/mk