Боли глава

Народ што фрлат камења и јајца по новите комшии пошо не му е по ќеиф нивната религија, а ги гласат лоповите што го дерет 30 години, не требит да се грижит за својата иднина.

Пошо ја немат!

Иљче Затаракоски, Фејсбук, 15.02.22.

Ние Македонците сме емоционални луѓе, ние Македонците сме патриоти, ние си го сакаме својот македонски јазик и држава, својата македонска нација и сето она што е свето и македонско, бидејќи тоа го примивме од нашиот свет апостол Павле, кој шеташе и чекореше по оваа света македонска земја. И затоа, примајќи ги овие свети молитви од овие наши дедовци и прадедовци, длабоко од душата и срцето верувам дека нашиот претседател на најголемата и најсвета партија ВМРО-ДПМНЕ, господинот Мицкоски, сè ова што го дадовме, верувам дека ќе го вратиме назад. Првин со него, а потоа и со Божја помош. Бог и мајката Божја Богородица ќе му помогне него и на сите негови соработници на сè она што е свето македонско, национално, да го врати назад и нема да дозволи некој што не ја чувствува Македонија национално да ја одредува судбината на нашата света земја.

Агатангел, митрополит на МПЦ; говор на „Свети Трифун“, 13.02.22.

Во градот во кој нема вода за пиење, кој се задушува од ѓубре и смог, во кој не функционира ни паркинг ни нормален сообраќај, на локалната власт од ДУИ ѝ биле поважни хонорарите на луѓето што ќе ѝ донесат гласови, па таа партиска лојалност ја купиле со 900.000 евра за хонорари од општинскиот буџет. А централната власт му префрлаше пари на Тетово да ги намали долговите. И ова не го прават командантите од ДУИ. Ова го прави интелектуалното крило, учените луѓе како Теута Арифи која имаше амбиции да стане амбасадорка во Вашингтон. А ако не стане, може и ќе падне коалицијата. Па уште и му одговара на Касами помалку да се занимава со неа, а повеќе со Тетово. Па таа што не се занимаваше со Тетово додека беше градоначалничка?

Горан Михајловски, 11.02.22., СДК

Некако интернетот (а со тоа и голем дел од светот) почнува нагло да губи смисла. Воспоставувањето глобална корпоративна автократија го шутна низ брдо сосе надежта за оживување на подзаборавените вредности, угушувајќи го секој обид за реанимација и откривајќи ја сѐ подлабоко мршата која сме ја буткале и ја буткаме под тепих долго време.

Сѐ се сведува на: Ако се чувствуваш слободен да си ги изразиш сопствените ставови на Интернет, веројатно ти си следниот плен на Cancel културата.

„Стисни си Cancel пред интернетот да ти стисне“ е новото „Подобро самиот да си пресудам отколку да паднам во рацете на окупаторот.“ Сѐ друго е заробување себе во комфорот на интернет-понудата, woke-културата и квази-интелектуалната галантерија.

Тања Аждаја, Фејсбук, 07.02.22.

Инклузијата не е замислена само да им помага на лицата со попреченост да ги остварат своите права и да им се понуди можност да учат од своите врсници (6 пати поефикасно отколку учење од возрасен), таа им помага на типичните да научат што е различност, пријателство, емпатија, солидарност, почитување... Ползата е за сите, без дискриминација.

Ако сте од оние кои одбиваат да го сфатат или прифатат тоа, ќе морам да ве потсетам дека попреченоста не е нешто што им се случува на другите; шансите вашите деца да добијат братучед, ќерка или внуче со попреченост се 1 во 25 случаи. Ама вие сте и над сите статистики, нели?!

Во конкретниот случај со Ембла, мораме да бараме одговорност од раководните лица во училиштето кои дозволиле работата да ескалира до овој степен.

Инклузијата не треба да биде нешто за што се залагаме само декларативно, мора да направиме сè таа да профункционира во пракса.

Ана Мартиноска, Фејсбук, 03.02.22.

Ги чекам Мицкоски и Апасиев да излезат и да ја критикуваат Владата зошто УКИМ е на 1594, а УГД штип на 3000 и некое место на ранг листата на универзитети.

Уххх, сега се сетив: па нема да излезат зашто тие се професори на двата универзитета. Треба да се чувствуваат засрамено.

Зоран Бојаровски, Фејсбук, 01.02.22.