Боли глава

Ако можат душа без анестезија да вадат, зошто да не оперираат срце?! Штом веќе оперираат срце, зошто да не оперираат и детско срце? Кога оперираат детско срце, зошто да не се оперира и со земјоделски гигант, кој ќе прави храна за секое срце? Ако прави храна, зошто да не прави и медиуми? Како бре - зошто?! Преродбениците има да прават сè во оваа држава! Кому не му се допаѓа, слободно може џаде да фати. Само нека пази, да не појде во некоја оф-шор земја, па повторно да мора алчните сурати да им ги гледа!

Никола Младенов, „Фокус“, 23, 12.11.

Мајката отсекогаш била инспирација за многу уметници, како и за мене. Сакајќи да ја прикажам големината на мајчинството се одлучив за оваа композиција во која се претставени четири мајки со блажена насмевка, неизмерна љубов, безгранична нежност и копнеж за среќен живот на своето дете.

Валентина Каранфилова – Стевановска, авторка на „Триумфалната капија“, „Воинот на коњ“ и на уште еден „грандиозен воин од 13 метри“; Вечер, 12.12.11.

Ние тука дискутираме и правиме стандарди, а забораваме дека ние сме, да не претерам, најмалку шест-седум генерации зад западните демократии, од аспект на цивилизациско, културолошко, политичко и економско ниво. Ние не сме спремни да го следиме примерот на западните демократии.

Љупчо Шврговски, невидливиот јавен обвинител на држава која ни минимално не ги исполнува неговите „цивилизациски нивоа“; дневен „Фокус“, 15.12.11.

Во западните земји (Британија предводи), не само Аристотел, туку и Шекспир и Пикасо се технолошки вишок.

Билјана Ванковска, „Нова Македонија“, 12.12.11.

Замислете си, кога секој ден, пред барокната зграда ќе запре оној големион камион на „Водовод и канализација“ што меѓу вработените го нарекуваат „гомнарката“, па од него ќе излезе Пеце или Љутви, со дневниот налог в рака, од тукушто завршената интервенција на затнатата фекална канализација на Илинденска бб. Со чизми до колена, па кога ќе загази по тоа мермерот, ќе остави иста трага како владата на Груевски со шестгодишно владеење во Македонија. А можеби мајсторите пак ќе си останат понастрана во некоја шупа во Бутел, кај гробиштата, а во 5000 мермерни квадрати ќе се шират лепачите на плакати на ВМРО ДПМНЕ?

Стевче Јакимовски, дневен „Фокус“, 10-11.12.11.

Подмладокот на УМС на ВМРО ДПМНЕ потпиша меморандум за соработка со здружението на слепи лица, а документот беше оверен на кирилично и на броево писмо.

Диме Спасов, претседател на УМС и државен секретар во министерство за правда; дневен „Фокус“, 06.12.11.