Архитектот Рикен Јамамото е годинашниот добитник на Прицкерова награда

Јапонскиот архитект Рикен Јамамото е годинашниот добитник на Прицкеровата награда, своевидна Нобелова награда за архитектура. Во текот на својата петдецениска кариера, 78-годишниот Јамамото проектирал и приватни и јавни згради, нагласувајќи го духот на заедницата во сите простори, од станбени објекти, музеи и училишта до аеродромски центар и пожарникарска станица.

„Со силниот, конзистентен квалитет на неговите згради, тој има за цел да ги подобри и збогати животите на поединци и нивните социјални врски. За него, зградата има јавна функција, дури и кога е приватна”, објасни одборот за доделување на наградата.

Јамамото, кој наскоро ќе наполни 79 години, кажа дека наградата е голем момент за него.

„Мојот занает не е само да дизајнирам згради, туку да дизајнирам во контекстот на нивната околина, кој, се надевам, ќе влијае и на околината”, изјави тој.

Еден од неговите карактеристични проекти е пожарникарската станица во Хирошима, чии фасада, внатрешни ѕидови и подови се направени од стакло, додека неговиот социјален станбен проект во Кумамото се состои од 110 домови во 16 кластери.

Јамамото е 53-от лауреат на Прицкеровата награда, која се состои од 100.000 долари и бронзен медалјон.

Извор: https://sdk.mk