Еден задоцнет пријателски совет

04.10.2018 15:47
Еден задоцнет пријателски совет

 

Александар Николовски така се беше залетал и запењавил доцна вечерта соопштувајќи ги ставовите пред камерите по состанокот на Извршниот комитет на ВМРО-ДПМНЕ, што морав да го проверам датумот во календарот: не, бе, не е април 2017, не е ни февруари 2015, па дури ни декември 2012 година – октомври е, 2018! Што му стана на човеков за да демонстрира таква агресија и таков заканувачки тон – како кога ги читаа, памтите, посмртниците за западните амбасадори во онаа приквечерина на Долгите ножеви – па со зацрвенети од возбуда образи, во идно-минато време диктира услови до власта како штотуку да победиле на изборите кои имаат намера да ги бојкотираат.

Туф, туф, туф… Да се смрзнеш од страв од одлуките што ги донел ИК на ДПМНЕ пак да ја земат Македонија во заштита од домашните предавници и светскиот заговор! И тоа баш дента кога некогаш арогантната и семоќна г-ѓа Гоца-Брк Јанкулоска утрото се расплака во судот на завршетокот на најлесниот судски предмет од десетината пред кои е кривично исправена.

Не многу часови пред тоа во Москва, по заедничката средба на врвот, Вучиќ соопшти дека добил сè што побарал од Путин, само не може отворено да каже за што разговарале. А бидејќи најважното што го разговарале, знаеме сите, е Косово, може ли таков српско-руски муабет да се води без да се вмеша и Македонија на масата, во тајните гаранции на Путин до Вучиќ? Еве, јас не сум паметен, вие кажете…

Впрочем, само пред два дена, во официјалните изјави и од Вашингтон (Бејли и усно ни ја прераскажа) и од Брисел, во апелот за разум до Мицкоски, доминираат зборовите „регион“, „стабилност“ и „безбедност“. Груевски и Мијалков (инсистирам, по тој редослед) мислеа дека се поголеми курнази од овие што имаат 24/7 дежурен авакс врз Македонија и дека, кога и на нив им го соопштуваа истото што сега, сè уште воспитано, му го кажуваат на Мицкоски, можеа лаконски да поминат со а-бе-кој-ги-е… За овие со аваксите не знам кој ги…, ама за нашиве точно знам кој ги пое…

За што плаче сега Гордана во суд, ве молам? Или она не била информирана за сè, како што ми личи токму сега и овој тинејџерски забревтан Николовски дека ќе раскажува наоколу кога ќе цмиздри за некое време? А што пари, време и енергија потроши германскана фондација „Конрад Аденауер“ за да ги научи вмровците како се држат политички нож и виљушка на цивилизирана европска маса во 21 век, за сега еден Мицкоски да си ги избрише чевлите од ЦДУ на Меркел како да се работи за чергата на некаков Стевчо Јакимовски на враќање од Ниш!

Сирот Јанко Бачев, што енергија и надежи вложи дека тој ќе биде рускиот фактор во Македонија. Во силен налет на најновите инструкции, ВМРО-ДПМНЕ го прегази како лепешка на друм!

Она што се обидувам да го кажам е дека влегуваме во мнооогу непријатна фаза, лоша за цела Македонија, бидејќи ВМРО-ДПМНЕ тукушто ги подигна влоговите за дестабилизирање на регионалната стабилност, што резултира со (повторно) палење на сите ноќни светла не по дипломатските, туку по оние западни канцеларии каде висат воени карти од Балканот на ѕидовите. Занимливо, не така одамна, и Груевски (а пред него и Љубчо Георгиевски) потполно пропушти да забележи кога од само проблем на Стејт Департментот, стана проблем и на Пентагон… Толку ли сте глупави, ни од сопствените грешки не учите – и тоа откако и американскиот секретар (!) и германската министерка за ОДБРАНА дојдоа да ве посетат во Скопје, чест да ви направат?!

Ете, затоа, да ви кажам пријателски совет, после 35 години разни искуства со нив низ целиов Балкан: кога ќе ви дојде задоцнетиот час, тие што ќе ве посетат нема да носат кожни чевли и штикли што ќе ви труцкаат по вештачкиот мермер што сте го монтирале во она кичерајско, малограѓанско партиско седиште; овие носат гумени ѓонови и не летаат со редовни комерцијални линии, па нема ни да насетите кога ќе ви дојдат од зад грб со предлог што нема да можете да го одбиете. Прашајте го како изгледа тоа овој, што ве храбри дека сега е време да издржите, оти во март се враќате на власт. Абдали, тој во март секако ќе биде на друго место.

А зошто ќе ви се случи сето ова? Ај што сте против волјата и историските интереси на најголемиот број граѓани на Македонија, тоа вие секако поинаку го интерпретирате во вашите вмровски догми; туку погрешно ве брифирале за тајмингот, бидејќи сега не е време кога можете да мислите дека ќе го срушите Заев, оти сте подраниле барем една историска холивудска епизода порано. Ама вам ви се брза, плачете по судови.

Затоа, кој нема стомак да го издржи она што ќе следува, сега му е вистинско време да се повлече од игранкава. После на солзите ни во Москва нема да ви веруваат.

Слики: Александар Јосифовски - Пеколно портокалово!
Извор: Цивил медиа

Слични содржини

ОкоБоли главаВицФото