Боли глава

Фрлив еден поглед врз шареното деснолево-па-во-центар друштво што беше дошло да ги продаде своите букети за малку престиж и пари, тука пред споменикот на основачите на вмро и пред младите луѓе кои со помош на бронза во паштетите или на некој курс на “Конрад Аденауер” се претвораат во безживотни гардисти што не може да ги возбуди ниту Гордана Јанкуловска ако реши да им се прошета во најпредизвикувачката комбинација на ” Викторија сикрет” и стигнав, од казанот на таа глупава церемонија, да црпнам троа цврсти основи за мојата основна импресија на Денот на револуционерна борба на македонскиот народ за неслобода: Македонија е проститутка која не престанува да си го сака својот Џек Трбосек дури и по 121 убод!
Па ми текна да ги извадам парите со кои на времето ме корумпираа Црвенковски и Колемишевски и да ги вложам тие дваесетина милиони евра во еден филмски проект кој би можел да се вика ” Проститутката што го сакаше својот Џек”! Филмот во жанрот гомно би го режирал конзорциумот Манчевски- Попов-Митриќевски, а Љубиша Георгиевски би бил надрежисерот кој со својата режисерска палка би го чепкал говното пред секоја проекција!

Бранко Тричковски; Фејсбук статус, 23.10.14.

Сакам да ја известам јавноста дека во моментов уредникот на Слободен Печат, Бранко Геровски прави се што може за да го уништи новиот весник Политико. Па така, дистрибуцијата која го разнесува Слободен Печат одби да го разнесува и Политико иако го разнесува и Вечер?! Со тоа тие се откажаа од неколку илјади евра месечно што ќе ги заработеа од дистрибуирањето на весникот без никакви дополнителни вложувања, нивните комбиња и онака возат до сите трафики па ова ќе им беше само плус заработка!

Но овде не престануваат сопките на Бранко Геровски. Замислете тој им забранил и на локалните дистрибутери во градовите низ Македонија да не смеат да го дистрибуираат весникот инаку Слободен Печат нема да им се дава за дистрибуција, а бидејќи тој е сега етаблиран весник нормално е дека локалните дистрибутери ќе подлегнат на уцената и затоа ние сега не се дистрибуираме низ неколку градови во Македонија. Но ќе го решиме и тој проблем набргу, за се има решение само не за даноците и смртта.
Саше Ивановски; Мактел, 18.10.14.

Временските, климатските промени кои се предвидливи и мерливи, покажуваат дека во воздухот се создава голема влажност. Последиците од тоа се големи океански бранови кои од просечните неколку метри, сега се издигаат со просек над десетина метри, и наскоро дваесетметарските бранови ќе бидат редовна појава во океанските бури. Со ова, трговијата со бродови преку океаните станува ризична и скапа. А САД, без трговија преку море, се сериозно загрозена економија.

Најголемата воена предност на САД е нивната морнарица. Дали е потребно да се спомнува колку нејзината мобилност е ограничена со новите климатски промени... Тие ќе мора да бараат нови, големи поморски воени бази, во далеку поголем број од сега, а тоа се нови пари кои САД веќе ги нема. Па, ако не може со пари, ќе мора со сила. А тоа се нови војни и нови дестабилизации на влади и држави кои ќе бидат цел на тие намери.
Драган Павловиќ Латас; Вечер, 12.10.14.

Среќа што овогодинешниот Извештај на ЕУ не ни го презентираа во декември - бидејќи тогаш за да ја дефокусира јавноста власта ќе мораше да го апси и Дедо Мраз. Вака ќе мора да се задоволиме со борба против еболата.
Васко Ефтов; Фејсбук / Мактел, 12.10.14.

Пред две децении се предлагаше закон со кој државата ќе им ги плаќа придонесите на фирмите за сите нови вработувања во првите две години. Тогаш тоа беше скандал, зашто дупката во пензискиот и здравствениот фонд ќе се зголемела на „фантастични“ 30 милиони евра годишно. Сега дупката во истите фондови е поголема од 35 милиони евра месечно, државата им ги плаќа придонесите, ама на странските фирми во индустриските зони, каде што заштедата оди надвор наместо да остане дома, а од наредната година дупката ќе се пополнува со наплата на придонеси и од хонорари. Па вие сега судете што е нормално.
Петар Арсовски; Утрински весник, 08.10.14.

Слушам дека на премиерот Груевски му се слошило додека го слушал краткото интервју во кое неговиот пулен Спиро Ристовски, пред камерите на Сител рече, во малку послободна интерпретација на мојата маленкост, дека дисперзијата на високото образование во Македонија произведува “морони” кои не знаат што да прават со дипломите што ги добиваат на бројните универзитети кои, пак, за да избегнат банкрот, го спуштаат нивото на образованието за да можат да произведат повеќе дипломи и дипломци за пониска цена по единица “морон”. Државата ќе се бори со оваа шокантна пракса преку некакви државни испити по втората односно четвртата година од студиите!
Во настојувањето да ги образложи мотивите за бесмисленатата идеја за државните испити, Спиро се занесе толку многу што во тие три- четири минути успеа да ја утврди како катастрофална една од клучните реформски политики на својот партиски и владин шеф: дисперзијата на високото образование, неговата идеја секој да може да студира во племната на дедо му, неговата идеја да се урне ”комуњарскиот” елитизам во високото образование, неговиот проект да го доближи високото образование до широките народни маси! Спиро мисли дека на тој начин во Македонија се произведуваат неквалитетни високошколски кадри што јас ги викам морони. И тој, а и јас, сме во право. Но, како што знаеме, главни оперативни директори во таа моронска слободна зона беа Спиро и неговиот претходник пред да премине на уништувањето на уште еден сектор, здравството- Тодоров! Но, Спиро, реков, се занесе и заборави дека идејата на неговиот шеф и беше да се произведат морони на кои (и на нивните фамилии, јасно) потоа ќе им биде мило да гласаат ко морони, односно за вемерето!
Мислам дека пред да ја спроведе идејата за државните испити, Спиро ќе наебе. Прво ќе наебе од Груевски, а второ, кога ќе му дојде времето, ќе наебе и од нас оти на идејата за државни испити ние мислиме да парираме со идејата за државни затвори: за Спиро, за Тодоров и, се разбира, за нивниот шокиран шеф!
Бранко Тричковски; Фејсбук статус, 05.10.14.