Боли глава

Вака изгледа навистина смешно, кога четириесет и кусур општини го зеле градежното земјиште под своја капа, а Општина Центар речиси една деценија по донесувањето на фамозниот Закон за децентрализација сеуште не може да располага со своите парцели, кои, патем речено, се најскапи.
Затоа Општина Кривогаштани ќе може да им подарува земјиште на сите ергени и моми што ќе се решат да стапат во брак и оформат семејство, а скопски Центар сеуште ќе работи по диктатот на само една Фамилија,
Владо Апостолов; Фокус, 17.01.14.

Откако го продадовте целото земјиште во Центар, сега си најдовте нов начин за криминал, па ќе правите фасади во барок. Законот вели дека со одлука на Советот може да се измени фасадата на зградата, без разлика што станарите не се согласуваат со тоа. Може едно утро да станете и да видите дека пред прозорот од станот имате поставено скеле и некој ви тропа на врата и вика кај собата каде што спие вашето бебе сега треба да биде тераса или прозор во барок. Замислете советот на општина Струмица да донесе одлука дека куќата на пратеникот Васил Пишев е од стратешко значење и на фасадата да го направи ликот на Славе Гошев или на Силвана Бонева, не знам кој е позаслужен во партијата од нив двајцата.
Јани Макрадули; Плусинфо, 20.01.14.

Ивона Талевска со која, за да не се стекне погрешен впечаток, и не сум нешто особено близок, е новинар-уредник, кој, се допаѓало тоа некому или не, има свои ставови и погледи на нештата, критички опсервации кон сегашната опозиција, отворена поддршка за низа владини активности и проекти, но сето тоа не претпоставува да ѝ го менуваме идентитетот и таа да почне да се одѕива на името Лимба и, велам, без никаков доказ да ја ставаме во матни замешателства. Не знам, можеби и има нешто неетичко во промените настанати по склучувањето на договорот, но ако е тоа и евентуално така, тогаш белегот на сето тоа, заедно со последиците, логично ми е да заминат на друга адреса - кај мајката на мојата колешка. Меѓутоа, речиси сум уверен дека озборувачката Петра и комшилакот од Бихаќска не се многу заинтересиран за родителот, туку дека токму палавото дете е причината за нивните нови „откритија“ за криминалот во државата.
Милан Банов, прорежимски колумнист; Нова Македонија, 17.01.14.

Тони е едно големо разочарување за сите нас. Сите ние сме излажани од пејачите и од актерите затоа што ги гледаме во нивните спотови, песни, нивните филмови и драми. Но забораваме дека тие таму се само актери, глумци, изведуваат перформанс кој друг го обмислил, напишал, креирал. Надвор од драмите, филмовите, песните, спотовите итн. актерите и пејачите и речиси сите наши славни фаци се едни обични ропаци утепани подложни на поткуп на омраза на ниски удари на гадно лично однесување... Дури и самите писатели се избрукаа со она срамно поклонување пред Грујо на Венко и Ферид во МНТ. МПЦ, МАНУ и останатата уметничка елита која е толку среќна во скутот на Грујо навистина го иницира прашањето за тоа каде е по ѓаволите скриена човековата доблест храброст достоинство чест добрина и дали воопшто таа постои или сите ние сме проклети гадови?
Саше Ивановски; Мактел, 04.01.14.

Јас кога прв пат го чув министерот дека е шокиран од неетичноста на тендерот, мислев дека можеби ја говори вистината. Но кога сега го гледам дека одбегнува одговори, гледам дека не е така. Не сум дал на татко и стрина, се брани министерот. Омилената уредничка ве вика сто пати на вести и ви вика колку сте паметен и колку убаво работите. Вие велите дека ова не е корупција? Не е татко и мајка, но печали милиони евра. Ова е корупција на медиумите и ја гледаме во најбезобразна форма. Сега се бесни и другите новинари кои работат за 300 евра, а омилените уредници земаат по илјадници евра.
Министерот е фатен 100:0. Но тој е само извршител, знаеме кој одлучува? Но тој доаѓа и ни држи лекции. Ние не сме корумпирале медиуми. Вие пратениците не смеете да му дозволи на министерот да си ги пере рацете. Кога ќе ја објави целата тендерската документација? На кои клиники е испорачана опрема и со кои е потпишан договор? Зошто болниците на кои им праќа опрема, велат дека веќе ја имаат? Министерот е фатен. Но рибата смрди од главата. Корупцијата на медиумите ја смисли првиот човек на Илинденска б.б. Министерот Тодоров е само извршител.
Радмила Шекеринска, во Собрание; Плусинфо, 16.01.14.

Кој си бре ти Илија Димовски? Да не си ТИ оној Св. Илија на кого во галоп му прдат расните коњи над ниските облаци во август, а овде мислиме дека грми? Да не си ти тој Илија громовник на кој расните коњи фрлаат чифтиња по божествената калдрма над облаците, а овде доле мислиме дека светкаат молњи? Или си ТИ оној Илија на кој кога ќе почне да моча од балконската ложа на новиот театар, оние доле да мислат дека врне пријатен пролетен дожд...? Немој бе Иљо, немој (не)среќо, немој данас...
Боки Бургија; Плусинфо, 14.01.14.