Прва добиена битка за Охрид!

09.03.2017 03:18
Прва добиена битка за Охрид!

Почитувани, со огромна радост ве известуваме дека по неколкумесечна битка за поништување на одобрението за градба на незаконскиот хотел во Лагадин кој лажно се претставуваше како објект во сопственост на ТУИ Холандија, Граѓанската иницијатива Охрид СОС успеа да ја извојува првата победа!

Имено, Државниот инспекторат за градежништво и урбанизам (ДИГУ) ни достави известување во кое се наведува дека бара од Општина Охрид да го поништи незаконски издаденото одобрение за градба.

Во меѓувреме, известување стигна и од Државниот инспекторат за животна средина (ДИЖС) во кое се вели дека општината го усвоила Општиот акт за Лагадин прекршувајќи ја својата законска обврска да спроведе оцена на влијание врз животната средина! Дополнително, Инспекторатот за животна средина ги потврди и нашите констатации дека објектот не смее да се гради на помалку од 50 метри од највисокиот водостој на езерото.

Овде секако вреди да се спомене и информација која отсуствува во известувањето, а тоа е дека при носењето на тој акт Општината им го попречила пристапот до правда на сопствениците на имоти во Лагадин усвојувајќи јавен документ за кој не се одржала јавна расправа каде што би се чуле гласот и мислењето на засегнатите граѓани.

Известувањата од инспекторатите се официјално проследени до сите советници од Советот на Општина Охрид.

Иако, како што бевме известени од Инспекцискиот совет на РМ, поради комплексната природа на случајот и многуте прекршени закони, постапката е сè уште во тек и конечното решение по случајот допрва треба да го добиеме - убедени сме дека ќе преовлада правдата!

Им се заблагодаруваме на сопствениците на имоти во Лагадин кои активно се вклучија во процесот и не мислат да дозволат кршењето на законите со кое се нанесува огромна штета на природата да помине неказнето.

Им се заблагодаруваме на сите загрижени граѓани од кои во изминатиов период добивме повеќе пораки со прашања во врска со моменталната ситуација во Лагадин што ни покажува дека будно ја следеле состојбата и дека нашите напори за актуализирање на горливите прашања во Охрид вродиле со плод.

Им се заблагодаруваме на сите службени лица кои одговорно и професионално си ја вршеа работата во текот на постапката и ги охрабруваме да продолжат така.

Истовремено, ги потсетуваме институциите кои ги прекршиле законите дека ќе одговараат и за најмалото сторено кривично дело.

Се раѓа нова надеж за Охрид! Заедно, сите ние освестени и совесни граѓани, можеме и ќе се избориме за правда! Денес не победивме само ние, денес победи и Охрид!

#OhridSOS

Со почит,

Активисти на Граѓанска иницијатива Охрид СОС

Извор: Охрид СОС