Протестен марш за поддршка на жртвите од „Јавна соба“

Разбуди се Јавно обвинителство, додека жените не се слободни сите сме заробени - порачаа учесниците на протестниот марш што се одржа на 3 февруари во Скопје, организиран од Платформата за родова еднаквост.

Учесниците на протестот носеа транспаренти со пораки: „Држава што угнетува е држава што силува", „Јавна соба е кривично дело", „Ти не си виновна", „Полицајците треба да не штитат“. Нивните барања се:

„Бараме од Јавното обвинителство неодложно и темелно да го расчисти случајот „Јавна соба“, кој претставува кривично дело во кое голем број жени се жртви на родово засновано насилство.

Бараме соодветни казни за администраторите на групите, како и сите членови кои праќале и се уште праќаат фотографии и пишуваат лични податоци на девојки и жени.

Бараме и инсистираме сексуалното вознемирување преку интернет посебно да се регулира и во Кривичниот законик.
Бараме соодветна грижа за жртвите од надлежните институции.

Неколку приведени членови и санирање на штети нема да нè замолчат. Будно ги следиме институциите и бараме сеопфатни решенија за превенција на родово базирано насилство“.

Фотографии: Ванчо Џамбаски