Боли глава

Од чувано куче, за кое некој се грижел, тоа одеднаш е оставено само во природа. Постојано е под стрес бидејќи се наоѓа во непозната средина. Може да загине, да се разболи или да го нападнат други животни.

Тие се парат со волците и прават хибридизација. Може да предизвика промена на изгледот и на морфологијата на волкот, а со тоа и да го загрози видот.

Неколку причини се посочуваат како клучни за зголемувањето на популацијата на кучиња во природните средини, и сите се поврзани со луѓето. Домашните миленици треба да бидат чипирани, за службите за заловување да може да го најдат сопственикот чие животно се загубило или кој намерно се ослободил од него на јавен простор. Но, такви служби нема доволно.

Диме Меловски, истражувач на рисовите и на други големи диви цицачи; ПРИЗМА, 10.08.22.

Ова за прекаријатните хонорарци не ми е баш најјасно.
Ако се уплаќаат придонеси, дали хонорарецот ќе има пристап, и ќе може да го остварува правото на пензиско и здравствено осигурување?

Како? Кога? Во која мера?

Што ако хонорарецот е пензионер?

Што ако има само една хонорарна исплата во годината?

Што ако има 10 хонорарни исплати во месецот од 10 различни нарачатели? Кои, рецимо, би надминале 6000 евра. Годишна плата. Има лимити за пензиско и здравствено. Ако во еден месец хонорарецот, или за него, има уплати колку што редовно вработен, или за него, има за цела година, дали хонорарецот ќе остварува право за целата година, или само за месецот во кој му се уплатени придонесите?

Јасна е паниката да се пополнат дупки, и намерата да се злоупотребат инструментите на репресија, ама немојте. Ќе згрешите.

За права станува збор.

Ќе ви дојде улицата у салите за состаноци, у кабинетите.

Лазар Попов, Фејсбук, 09.08.22.

Не честитам Илинден на народ кој се храни од национализам, кому не му пречат корупција и крадење, кој ја загадува секојдневно земјата што ја величи и божем ја сака, кој полни концерти на Цеци анд ко., кој слави мртви повеќе одошто цени и сака живи луѓе. Ништо од ова нема врска со патриотизам. Спротивно, сето значи лични его, фрустрации, неукост и лековерност спакувани во македонска мелодраматичност од која ми е смачено. На сите други, честит празник!

Герман Филков, Фејсбук, 02.08.22.

МАНУ троши огромни пари за симболични резултати. Таа не само што ја храни државата со празна лажичка, туку живее со евтин популизам. Нејзиниот статус треба да се смени. Во развиените земји такви структури веќе се демоде. Обично постојат институции кои нудат можности со проекти, па никој не добива никаков паушал, туку заслужени пари од реализирани проекти. Да добиете над 1000 евра во оваа криза, плус пензија или плата, плус хонорари, е ептен претерано. Затоа сериозно треба да се види како се работи низ нормалниот свет. Вака „во име на науката до џебот на граѓаните“. Таа институција се испостави дека претпочита колонизаторски статус кон народот. И сега нашите академици земаат многу повисоки паушали од хрватските академици, а просечната плата таму е над 1000 евра. Но, вашата академија продолжува да лета без навигациски систем!

Мерсел Биљали, Плус инфо, 31.07.22.

Русија ја нема ослободено Македонија од отоманскиот јарем (како што ја има „ослободено“ – и окупирано – Бугарија). Русија ја нема создадено македонската држава (како Кнежеството Бугарија). Руски трупи немаат учествувано ни во ослободување на Македонија од фашизмот (делумно учествуваат бугарски трупи, согласно договорот од Крајова помеѓу Тито и Терпешев). Македонија никогаш не била дел ни од Советскиот „лагер“, како што беше Бугарија. За каква „заедничка религија“ зборува Лавров, кога Руската православна црква со децении не ни помислуваше да ја признае МПЦ?

Жарко Трајаноски, Слободна Македонија, 23.07.22.

О боже, дај ѝ на владата сила да одолее на внатрешни и надворешни притисоци за корупција на ист начин како што одолеа на сите критики и јавно мислење против францускиот предлог. Обедини ги политичарите со иста решителност да прередуваат дупови, маркички и стекнати права за да се удостои и бетонира чист јавен интерес. Со иста сила да кажат не на концесии за деца на партиски другари и да ги задржат билатералното натигодајмение надвор од рамката на владение. Нека застанат на патот на договори во четири очи како оној со бехтел енка или оние за итни набавки на елем. Нека има сила да не потпишува партиски назначувања на оние на јавна служба. Дај им глас и храброст на ботовите онлајн, онака како што ловеа вештерки сега, да им се чуе гласчето во борба против корупција отсега.

Миша Поповиќ, Фејсбук, 18.07.22.