Боли глава

Зад сите овие возбудувања остана скриена веста дека под џиновските глави на Велигденските острови се пронајдени исто толку џиновски, ама закопани, тела. Тоа се оние острови што во оригинал се викаат „Папокот на светот“, а џиновските глави, моаи-скулптурите, се одраз на нивното сфаќање на одбрана на нивниот идентитет. За волја на вистината, идентитетот го одбранија, само што тие – исчезнаа. Токму поради големите глави, во кои нема мозок, и закопаните тела – за да не се соблазнуваат нивните морални сопрузи.

Ѕвездан Георгиевски, „Глобус“, 29.05.12.

Има две личности што нè поврзуваат нас со Рим, една е светите Кирил и Методиј а втората е Мајка Тереза.

Никола Груевски, во обраќањето кон папата Бенедикт XVI; дневен „Фокус“, 26.05.12.

И оттука, некои реакции на моето интервју за МИА дека било емотивно се нелогични и се критика без јасна цел, која доаѓа од луѓе кои не знаат да разликуваат вистина од емоција. Во таа смисла, да, нашата реакција е емотивна. Нашата реакција е логична и реална! Што треба да правиме? Да се радуваме? Да ја криеме реалноста и да забошотуваме и замајуваме сопствениот народ? Да бидеме политиканти од профилот на еден политичар кој ни се промовира на македонската сцена цели 20 години? (...) Ние не сакаме и не знаеме да бидеме лицемерни... Не. Ние кажуваме директно. Јасно и прецизно. Искрено и чесно. Никогаш не очекувајте дека ќе лажеме.

Никола Груевски, во писмото до пратениците на СДСМ; „Курир“, 22.05.12.

Бирото за јавни набавки објавило известување за склучен нов договор помеѓу „Водовод“ и австриската фирма „Алпине“ заради непредвидени и дополнителни работи настанати при изградбата на новата управна зграда, во износ од 12,5 милиони денари или околу 203.000 евра. Верувале или не, анексот е склучен за темелите за новата барокна зграда на скопски „Водовод“. Скандалозно, го предвиделе барокот, ама ги заборавиле темелите. За луѓе домаќини правилото е дека куќа се гради од темел. За ДПМНЕ и Коце Трајановски куќата почнува со фасада, по можност барокна, а темелот го ставаат на крај.

Александар Наумоски, заменик-координатор на советничката група на СДСМ во Град Скопје; „Плусинфо“, 20.05.12.

Деновиве разбрав една чудесна приказна за нашиот Пастир. Легендата вели дека тој, по повод најавите дека дел од екипата на укинатата А1 телевизија ќе формира информативна програма на А2 телевизија, во кругот на своите најблиски соработници, изјавил: „Попрво јас ќе направам сунет, одошто А2 да проработи“. Некој лош и малициозен човек би помислил дека Пастирот се заканува и дека најавува уште една пресметка, со грст луѓе кои сакаат да го вратат духот на А1 телевизија во етерот. Но, јас сум длабоко убеден дека некој погрешно го разбрал и погрешно го пренел кажаното. Имено, верувам дека во духот на неговото возобновено пријателство со Брисел, кога го спомнал сунетот, човекот мислел да го одбележи проработувањето на А2 телевизија (наследничката на „торбешката“ А1 телевизија, како што ја нарекуваше Латас), со чин на обрежување на пенисот, како израз на негова почит кон религиите кои ја поддржуваат оваа практика.

Бранко Героски, „Фокус“, 18.05.12.

Тито бил разни работи за време на животот, а уште повеќе по смртта; ретко богат  возбудлив задгробен живот имал југословенскиот марша-л-улема, променил повеќе клубови одошто Слободан Јанјуш: бил и чешки гроф и полски Евреин, и руски измамник и слободен ѕидар, агент на КГБ и агент на ЦИА, и вонбрачен син на Черчил и вонбрачен син на Франц Фердинанд; Јосип Броз бил разни работи, само сè уште никогаш не бил муслиман. Сега, ете, остана само некој белградски историчар ексклузивно да открие дека Броз всушниост бил црнец, со вистинско име Џозеф Бросе, надничар, женкар и џез пијанист од Њу Орлеанс, и бегајќи од љубоморната жена и нејзината луда мајка, стара вуду врачарка, се пријавил за учество во Првата светска војна.

Борис Дежуловиќ, „Oslobođenje“, 10.05.12.