Предавање

Пушков рече:
-Жената е љубовна машина - и истиот час доби по муцката.
-Зошто? - праша Пушков, и бидејќи не доби одговор на своето прашање, продолжи:
-Еве што мислам: на жената треба да ѝ се упикувате. Жените го сакаат тоа и само се прават дека не го сакаат.

Тука Пушков повторно го треснаа по муцката.

-Ама, што значи ова, другари? Тогаш нема ни да зборувам - рече Пушков, но по кратка пауза продолжи:
-Жената е направена така што целата е мека и влажна.

Тука Пушков повторно го треснаа по муцка. Пушков се обиде да одглуми дека не го ни забележал тоа и продолжи:

-Ако ја помирисаш жената...

Но овде го треснаа Пушков толку силно по муцката, што тој се фати за образот и рече:

-Другари, во вакви услови е апсолутно невозможно да се одржи предавање. Ако ова се повтори, ќе замолчам.

Пушков направи кратка пауза, па продолжи:

-Каде застанавме: Ах, да! Значи, жената сака да се набљудува себеси. Таа седи пред огледало пиштол гола...

Кај овие зборови Пушков пак доби по муцката.

-Пиштол гола! - повтори Пушков.
-Трас! - го замаваа по муцката.
-Пиштол гола! - извика Пушков.
-Трас! - го удрија по муцката.
-Пиштол гола! Пиштол гола жена! Пиштол гола риба! - врескаше Пушков.
-Трес! Трес! - се истураа удари врз Пушков.
-Рибина опашка! - викаше Пушков, избегнувајќи ги ударите. - Гола монахиња!

Но, тогаш го удрија Пушков толку силно што се онесвести и падна на подот како покосен.

Превод: Иван Шопов
Слика: Хана Хил