1015 hPa
76 %
11 °C
Скопје - Пет, 26.04.2024 09:35
Во својот дом во Скопје, доцна синоќа, ненадејно почина македонската писателка Светлана Христова Јоциќ. Ќе остане запомнета по своите метафорични стихови и константните обиди да допре до длабочината на зборовите и нивното значење.
Светлана Јоциќ е родена на 27 февруари 1941 година во Ресен. Има дипломирано на Филозофски факултет во Скопје. Во Друштвото на писателите на Македонија беше активен член повеќе од четири децении, а ги вршеше во различни периоди и должностите на секретар, претседателка на Друштвото, претседателка на Советот, главна уредничка на ревијата „Стожер“.
Основач е на Меѓународната манифестација „Македонски духовни конаци“, каде што беше долгогодишна и единствена претседателка и главна и одговорна уредничка на списанието „Портал“.
Јоциќ е автор на десетици поетски книги: „Калесница“ (поезија, 1970), „Скришен ковчег“ (поезија, 1974)", „Сињо“ (поезија, 1980), „Самечка ќелија“ (поезија, 1993), „Душница“ (избор поезија, 1993), „Силенто“ (поезија, есперанто, 1995), „С. Бесмртна“ (поезија, 1996) и „Голема молитва“ (поезија, 2000), а е авторка и на многубројни литературни критики и книжевни трудови. Нејзината поезија е преведена на неколку странски јазици.
Добитничка на наградите „Браќа Миладиновци“, „Ванчо Николески“, „Димитар Митрев“ и „Книжевен жезол“.