Unheimlich*

Дали од неодамна
невдомено домувам
во среќната Европа,
само од страв дека
потиснатото кога-тогаш
повторно ќе се врати?

Уште ли ќе сонувам
за сопствената слобода,
надвор од кршливиот дом,
на возраст кога за мнозина
вечниот дом е најпривлечен
поради своето спокојство?

Стравот од влијание на оние
од онаа страна на стварноста
не е само страв од поетско
или филозофско влијание,
туку страв дека сум веќе
отаде принципот на задоволство.

Игри на повторувањето
како игри на постоењето:

Јас и Европа, Европа и Јас.
Ти и Европа, Европа и Ти.
Ритуални кружења.
Вртоглавица.

Совршена љубов
кон невдоменото домување!

* Unheimlich (герм.) Uncanny (анг.) – необично, несекојдневно, загадочно, тајновидно, непријатно, обеспокојувачко. Битен термин кај Сигмунт Фројд од неговиот истоимен есеј Das Unheimliche (1919) со кој се појаснуваат состојбите во кои нешто може да биде блиско, но едновремено и далечно и туѓо. Тоа е она што потсвесно нè потсетува на сопствениот Id, на нашите заборавени и репресирани импулси разбрани како заканувачка сила од нашето Super-ego. Сево ова резултира со чувство како за „нелагодно туѓо“ или „нелагодно блиско“, создавајќи една „когнитивна дисонанца“.