Светски познати теоретичари на уметноста ќе одржат онлајн предавања во МСУ

Музејот на современата уметност – Скопје во рамките на Интердисциплинарната програма започнува со онлајн предавања со наслов „Без/редие во светот на уметноста“.

Предавачи во рамки на програмата се водечки автори, теоретичари и експерти околу актуелни прашања и согледби врзани со уметноста, како: Сантијаго Забала, (Santiago Zabala), кој ќе одржи предавање на 29 октомври, Шантал Муф (Chantal Mouffe ) на 14 ноември, Ејал Вајзман ( Eyal Weizmen ) на 25 ноември, Кети Чукров (Keti Chukhrov ) на 10 декември и Џеф Диаманти (Jeff Diamanti) на 17 декември.

Сите предавања започнуваат во 18.30 часот и ќе бидат реализирани преку ZOOM, а линкови за следење на предавањата ќе бидат овозможени преку официјалната веб страница на музејот и преку страницата на МСУ на фејсбук.

Автор на програмата е Тихомир Топузовски, раководител на интердисциплинарната програма во МСУ и главен и одговорен уредник на списанието „Големото Стакло“. Топузовски пред секое предавање ќе има свој вовед и понатаму прашања во рамките на предавањата. Основните определби на оваа програма е да претставува и промовира современи критички форми на знаење, методологии за истражување, како и анализи и разбирање на уметничките и културните практики.