Дупка

и овде
доаѓа маглата од мојот град
и овие планини се исти
ова месо е диво
ова дете е живо
јас го гледам пеколот
и тој е 2418 километри источно од
тука
каде што светот се губи сиво
каде осаменоста на мојот одраз во огледалото
пука
пред публиката
и републиката
во пламен
овој камен е само камен
верувам дека ќе прозбори
сакам да се бори
оваа војна не знае што е тоа ров
ниту љубов
не смееш да ја заборавиш вистината
јас знам дека убива празнината
не го обвинувам куршумот
за злосторството на
дупката
срцето крвари и пред твојот
метал да помине низ него
чудно
е што нештата убиваат
кога ги нема
и ниеден цвет не ја убива
пупката
моето знаме е бело
мојот непријател е тело
во почетокот е збор
а, на крајот зазор
овие раце се чисти
јас сум величествено безначајна
и лош противник
бидејќи сакам да изгубам
сите планини се исти
сите врвови се исти
таму си сам