Боли глава

За Македонија нема потреба и да се зборува премногу. Нејзиниот бренд има сила на најзаводлива рокенрол-балада. И така, во прекарот на мојата татковина, Република Македонија – ФИРОМ е содржана цела една лепеза од релевантни историски содржини, значајни за целокупната светска историја. И не само тоа, таа е земја со најбогатиот фолклор и најцрвените патлиџани на планетава.
Александар Станкоски, „Утрински весник“, 06.11.12.

Во првите 40 компании во Македонија, 4 се занимаваат со трговија со струја, со приходи од 105 милиони евра, 55 милиони евра, послабите со „бедни“ 36 милиони евра, но зад себе затоа имаат 5, 1, 1 и 2 вработени. Да биде иронијата поголема во компанијата со 2 вработени една е лидерот на Гласот на светлината. Малку попрецизната анализа (која за жал ниту Регулаторната ниту Шврговски не ја прават) покажува дека фирмата која има приход од 105.995.468 евра има добивка од само 709.973 евра, со 5 вработени трошоците и биле 104 милиони евра и кон Република Македонија платила давачки за добивка од само 700 илјади евра!!! За разлика од неа, фирмата која е рангирана на 30-то место, и има приход од 54 милиони евра, направила загуба од 1,2 милиони евра и Македонија добила голема нула. Секако педантната анализа на овој исклучително корисен материјал ќе покаже и дека постои фирма ќерка на АД „Топлификација“, со име „Топлификација“ (инвентивно поприлично) која во 2011 имала приход од 35,5 милиони евра со НУЛА вработени и веројатно затоа стигнала до добивка од само 233.000 евра, додека компаниите: Снабдување Центар, Исток и Запад со 30, 70 и 28 вработени прават многу помалку профит и се некаде на дното од 200 најуспешни компании во Македонија.
Јани Макрадули, „Плусинфо“, 07.11.12.

И непроветрениот воздух во владината сала влијае штетно. Оној познат и популарен д-р Оз на една од најгледаните ТВ-емисии во Америка кои и нашите гледачи имаат можност да го видат преку Хрватската телевизија вели дека луѓето не треба да се срамат што испуштаат гасови. Тоа е здраво и неопходно за човечкиот организам, а се случува најмалку 15 пати за 12 часа. Не е ништо страшно ако малку замириса, треба да се отвори прозорец и да се проветри просторијата. Пресметав дека ако за време на седниците на Владата покрај премиерот, министрите и нивните соработници и стручни служби се поканети експерти и стручњаци, тогаш обично присуствуваат околу 40 до 50 луѓе. За 16 часа, тие според д-р Оз, испуштаат гасови вкупно од 760 до 950 пати. Што не е безопасна концентрација ако нема добро проветрување.

Ерол Ризаов, „Утрински весник“, 05.11.12.

Груевски е боксер, кој боксува само пред огледало. Тој не е спремен да влезе во ринг. Има една албанска поговорка - „Џаш ми џаш, судија наш“ - 6 на 6, ама судијата да биде на негова страна. Тој сака таква игра да игра. Ќе одиме на избори, ама ако може медиумите, институциите, парите да бидат на негова страна. Тој е таков играч. Се работи за еден класичен илеџија во секоја ситуација, за еден обичен плачко. Тој во ниту еден момент не излезе како витез во ова политичко поле, да го поделиме мегданот онака како што треба и да биде волјата онаква каква што е на граѓаните.
Стевче Јакимовски, градоначалник на општина „Карпош“; „Фокус“, 02.11.12.

Понатаму, во овој процес на поништување на Македонија и македонскиот народ, пресудно е дисконектирањето на словенскиот океан од народи (најголемата антрополошка групација од белата раса) од својот историски корен, кој меѓу другото го содржи и постоењето на македонската империја, која на светската сцена го инаугурираше геостратегискиот концепт на Евроазија.
Александар Станкоски, „Утрински весник“, 30.10.12.

Јас си ја носев својата значка, а и Тачи носеше некаква значка, но мојата беше поголема.
Ивица Дачиќ, премиер на Србија, зборува за државните симболи присутни при средбата со Хашим Тачи; „Блиц“, 19.10.12.