Боли глава

Нашите подморници се способни да лансираат преку 500 нуклеарни боеви глави, што го гарантира уништувањето на САД и на сите НАТО земји. Ги имаме и најбрзите стратешки бомбардери на светот.

Зошто ни треба светот ако Русија не е во него?

Дмитри Кисељов, новинар и ТВ водител кој се смета за водечки глас на Кремљ; Вести недели, 27.02.22.

Македонската влада треба да се воздржи од симболични „мерки“ на „осуда“ и „санкции“. Владата треба да преземе КОНКРЕТНИ и итни мерки:

1) Да ја расчисти руската милитаристичка пропаганда во свој двор, да ги збрише сите руски агит-проп мегафони и сите руски агит-проп агенти („новинари“, политичари и црковни лица).

2) Да испрати безбедносен контингент и медицински персонал во Полска и балтичките земји за помош во справување со неизбежната бегалска криза.

3) ВЕДНАШ ДА ГИ ОТВОРИ ГРАНИЦИТЕ И ДА ПОДГОТВИ ПРИБЕЖИШТЕ ЗА БЕГАЛЦИ ОД УКРАИНА!

Јордан Шишовски, Фејсбук, 25.02.22.

Денешниот ден е еден во 200 години. Ден - палиндром и ден амбиграм (се чита исто и од напред и одзади, а ако е напишан со дигитални цифри, и одгоре и оддолу).

Се плашам ослободителната пресуда за Пале некои жени ќе ја разберат како дозвола своите насилни мажи да ги убијат, наместо да ги напуштат.

Магдалена Стојмановиќ, новинарка; Мактел, 17.02.22.

Толку бесрамно се сметаат за привилегирана класа, што веќе не се ни кријат па си дозволуваат Синдикат да ги изусти зборовите„омаловажување“ и „понижување“ зашто им ја покачиле платата на работниците од кои тие земаат плата. Осилени се. Имаат минат труд. Којзнае колку ора изиграле по комитските вечери, колку плакати излепиле, на колку митинзи вееле знамиња, колку часа отседеле на компјутер да тролаат по социјалните мрежи, колку пари им дале на локални партиски моќници. И сега партиите мора да си го одржуваат тоа гласачко тело. Тоа не е јавна администрација. Тоа се јавни гласачи. Тоа е партиска администрација што ни се продава како јавна администрација. Демек, во служба на граѓаните, а тие се во служба на партијата што ги вработила. Граѓаните – неуслужени. Ги молеа да се појават на работа, за време на пандемијата не ни одеа на работа, па се виде дека државата и општините функционираа и без нив, па после на сето седење дома си ги искористија и одморите, па уште и К-15 бараат да им дадат, никого не можат да избркаат за неработа, а и тие што ги избркаа судот ги врати, па уште и заостанатите плати им ги платија. Сè што се прави во државата се прави за тие да бидат среќни и задоволни. За да гласаат.

Горан Михајловски, 11.02.22., СДК

Многу од вас можеби нема да се согласат со ставот што ќе го искажам, можеби ќе го сметаат и за старомоден - но јас држам до него. Телевизиските серии, колку и да се добри, а има некои навистина квалитетни, сепак не можат да се споредат со филмот како медиум. Колку и да е добра, серијата е секогаш инфериорна во однос на долгометражниот филм прикажан на големото платно. Има нешто затапувачко за самиот гледач во серијата, особено ако гледа цела сезона од неа одеднаш. Прозаичноста на серијата не може да се спореди со поезијата што ја нуди мракот на кино-салата, нејзината тривијалност ми станува сосема очигледна во споредба со величенственоста на филмот штом ќе го чујам звукот на проекторот.

Животот е премногу краток за да се потроши на гледање серии, а не е доволно долг за да се изгледаат сите филмски ремек-дела. Сериите се фаст-фуд што секогаш ќе те остават гладен, колку и да ги конзумираш. Филмот е волшебна гозба што ќе ти го исполни духот и ќе ти го облагороди срцето.

Марко Петрушевски, Фејсбук, 01.02.22.