По Кина и Италија, владата на роуд шоу на Антарктикот

По минатонеделната, шестдневна бизнис посета на повеќе градови во Кина, и сегашната на Италија, од извори блиски до владата Пара вести дознаваат дека владиното роуд шоу ќе продолжи со дводневна посета на Антарктикот.

Економскиот тим, предводен од премиерот Никола Груевски, ќе го искористи престојот на Јужниот пол за средби со потенцијални пингвински инвеститори на кои ќе им се презентираат економските и инвестициските можности на Македонија, вклучувајќи ги и сите даночни и административни бенефиции што им се нудат на останатите човечки инвеститори.

Македонскиот премиер вчера најави и средба со реномирани политички претставници на пингвините од Антарктикот, како и средба со раководството на сестринската партија ВМРО-Пингвинска, на кои ќе се дискутира за зацврстување на политичките, деловните и културните врски меѓу нашите две пријателски земји. Освен тоа, Груевски ќе одржи и економска презентација на Македонија пред повеќе антарктички компании.

Како гест на добра волја, Македонија на Антарктикот ќе му подари и дваесетметарска скулптура „Пингвин на коњ“, која ќе го краси главниот плоштад на престолнината на оваа земја. Авторка на скулптурата повторно е Валентина Каранфилова-Стевановска, а споменикот ќе чини 100 милиони евра.