1019 hPa
39 %
26 °C
Скопје - Нед, 28.04.2024 16:59
Зборот изречен нежно, со душа
- најдалеку се слуша.
Може да викате,
да се лутите,
да беснеете,
можете да крескате,
да се буните,
да се смеете,
можете како гром да трескате,
како ѕвонец да ѕуните
и чудно да ви биде на душа -
што никој не ве слуша!
Можете полека, и нежно,
како што снежи од
небото снежно,
можете тихо, леко,
како што паѓа пердувчето меко,
како што шепоти трева кога расте,
и како што сонот доаѓа, се пласти,
можете да побарате и замолите,
скромно, тихо, со смирена душа
та секој да ве разбере,
та секој да ве слуша.
Глигор Поповски е еден од најпознатите македонски писатели за деца. Роден е на 1 април 1928 година во село Будинарци, Беровско. Завршил учителска школа во Скопје, а работниот век го поминал во „Пионерски весник“, работејќи како новинар, во книгоиздателството „Детска радост“, каде што извесен период бил и главен уредник, а ги уредувал и списанијата „Другарче“, “Развигор“ и „Росица“. Член е на Друштвото на писателите на Македонија од 1954 година.
За своето творештво како детски писател Поповски бил наградуван со: „Партизански курир“, „Младо поколење“, „13 Ноември“, „РТВ – Скопје“ на Струшките вечери на поезијата, во два наврати: во 1969 и 1973 година, „Курирче“.
Починал во Скопје, на 14 мај, 2007.