Боли глава

Паднат плафон во градинка. Се прашувам колку дена жал ќе прогласевме ако имаше мртви деца или учителки. Пред некое време беше изгорениот автобус или болницата. Тие што гинат на улица веќе не ги ни броиме како достојни за ден на жалост.

Како изгледа корумпирана држава денес во мојата област, образованието?

Еве, јас ќе ви го кажам она што сите го знаат:

На државна матура масовно се препишува. Прашањата се одговараат групно, тимски, весело. Екстерно тестирање или државна матура - го нема тој испит од којшто ние не можеме да направиме фарса. Оние што најмногу треба да го воспостават редот, достоинството, академската чесност на чинот - МОН и ДИЦ, влегуваат по училници и на наставниците што ги чуваат испитите им апелираат на „флексибилност“.

Татјана Б. Ефтимоска, Фејсбук, 14.06.22.

Дали можете да ми посочите еден единствен пример кога некој од ВМРО (пред 14 април, 2022) кажал некогаш нешто против Ванчо Михајлов? Во свој говор, во своја колумна, или во муабет на маса?

Како тоа преку ноќ, на 14 април, Ванчо Михајлов стана ЛОШ? Како тоа тој стана ФАШИСТ? За првпат во историјата?
Јасно ли ви е зошто немаше ламбевци кога фигури од Ванчо Михајлов се ставаа во музеите во Македонија? Јасно ли ви е зошто немаше ламбевци кога се откриваа споменици од Тодор Александров и од Ќосето? Или кога на зградата од МНР беше поставена статуа од Симеон Радев?!
И сега ВМРО ќе ја спасува Македонија од фашистот Ванчо Михајлов?! Really?! Ќе ја спасува со ставање чорап на глава и предизвикување пожар? И со плакати „И јас сум Ламбе“?!

Па ЛАМБЕВЦИТЕ ги има и во Македонија и во Бугарија. Токму Ламбевците на двете страни од границата ги прават сите штети за Македонија. Свесно и смислено. И вие сега сакате да бидете Ламбе?!

Ацо Лукароски, Фејсбук, 08.06.22.

Во Македонија има луѓе кои себе се перципираат како Бугари.

Тие имаат право на ова и имаат право да формираат здруженија.

Она на што немаат право е:

- да пропагираат идеи на тоталитаризам и посебно највисокиот облик на тоталитаризмот - фашизмот;

- да ги повредуваат правата на другите со негирање на нивната етничка, национална, јазична определба;

- да делуваат спротивно на Уставот (на пример, контра суверенитетот на државата, службениот јазик на државата итн.).

Значи, кога зборуваме за отворањето на клубот со име „Иван Михајлов“ во Битола или регистрација на некое здружение, не се работи за тоа дали има или нема Бугари во Македонија и дали имаат или немаат право на здружување, туку за тоа дали се почитуваат Уставот и законите на Македонија.

Мирјана Најчевска, Фејсбук, 08.06.22.

Кога Бугарија ќе изгради универзитет во Скопје, универзитети во Битола и уште три други града, да отвориме неколку гимназии и неколку основни училишта. Тоа чини пари. Ете ви буџет. Ако треба една милијарда, ако толку ни е важна таа Македонија, да извадиме една милијарда и да платиме за тие училиште. Да одиме со бугарски учебници во овие училишта и да престанеме да им бараме на Македонци да си ги сменат своите учебници затоа што не ни се допаѓаат. Ќе кажеме дека доаѓаме ние, со бугарски учебници, тие деца ќе учат според нашите учебници. Следствено, тие деца што ќе учат по наши учебници, сосем природно ќе посакаат да станат државјани на Бугарија и сосем природно ќе се идентификуваат со бугарската свест и култура. Ова е нешто што може дасе постигне за не повеќе од 10 години. Менталитетот на соседниот народ со доволен буџет може да се смени.

Соломон Паси, поранешен бугарски министер за надворешни работи; Македонски весник, 22.05.22.

Нашата европска интеграција, зборувам за Северна Македонија и за Албанија, е заложник на Бугарија. Таа наша европска интеграција е сведена на зборување за историја, што практично сите земји од Европската Унија гледам дека го оправдуваат.

Димитар Ковачевски на самитот „Македонија 2025“, 18.05.22.

Случајот кој го открива ИРЛ за влијанието на Кабинетот на Анѓушев врз решение на физибилити студија која потоа станува одлука на Влада мора сериозно да се разгледа и од ДКСК и од Јавно обвинителство. Уште еднаш на виделина излегува колку е мала грижата за интегритетот во процесот на носење одлуки и колку лесно приватниот интерес си го наоѓа своето место и станува јавна политика.

Миша Поповиќ, Фејсбук, 18.05.22.