Боли глава

На Македонците што зеле бугарски пасош не им е страв. Ним им е срам. Оти морале да кажат дека се Бугари за да земат пасош од ЕУ. Ваделе ЕУ пасош за подобар живот. Исто како што Бугарите од Бугарија уште првата година кога нивната земја стана членка на ЕУ побрзаа да бараат работа во Велика Британија, Германија, Шведска, Италија… За подобар живот. Откако Бугарија влезе во ЕУ, бројот на жителите се намали за еден милион. Би се пишале Македонците и Клингонци ако клингонскиот пасош би им отварал врата за подобар живот. Ама се пишале Бугари, оти бугарскиот систем за издавање ЕУ пасош им бил најлесен и најкорумпиран. Дај му пари на Каракачанов и ќе ти најде адреса на некоја бандера во Ќустендил, Благоевград или Петрич да ти ја стават како адреса на живеење и – бркај работа низ ЕУ.

Горан Михајловски, СДК, 02.04.22.

Вчера бев излезена со постара пријателка, Германка од Нирнберг. Нејзината мајка изгубила двајца браќа на источниот фронт - еден од нив имал само 18 години, бил убиен при опсадата на Сталинград. Нејзиниот татко исто така изгубил двајца браќа, не се знае каде. Таткото спасил глава само зашто двајцата постари браќа биле загинати па не го мобилизирале. При таа музејска прошетка, наоѓаме еден стар човек во количка што ја буткаше друг, средовечен маж. Стариот имаше капче со знак дека е ветеран од Втората светска војна. Не ми се веруваше па застанав и го прашав, како е тоа можно? Во 1944 имал 19 години и бил припадник на воздушна десантна единица. Ни се пофали дека учествувал во последните бомбашки напади на Берлин и дека пред само една недела се вратил од Германија каде што бил поради положување на споменик на местото на една од последните битки. Германската пријателка искоментира: значи, овој фрлал бомби НА НАС - СОСЕМА ЗАСЛУЖЕНО. ТАКА НИ ТРЕБАШЕ.

Сè додека на Балканов не сме во состојба да кажеме нешто слично во врска со тоа што сме си го правеле едни на други, нема да биде ништо од нас како луѓе.

П.С. Го пишав ова поттикната од нападите на Мирјана Карановиќ која рекла дека НАТО бомбардирањето на Србија било оправдано, ако не и задоцнето.

Анета Георгиевска Шајн, Фејсбук, 28.03.22.

Не е зашто сме на еден меч од Светско. Не е ни зашто победивме европски прваци, со тим од 770 милиони фунти спрема нашите 58, на нивен терен. И тоа без најдобриот ни фудбалер поради суспензија. Неколку месеци откако ни се пензионираше најдобриот што некогаш сме го имале.

Најголема е зашто победивме „досадно“. Прибрано, интелигентно, пресметано, дисциплинирано. Со само еден жолт картон во саат и пол опсада пред нашиот гол.
Да, се браневме и кога ја победивме Германија лани, ама двете најубави акции на мечот беа нашите два гола. Изградени, атрактивни, мераклиски. Моменти на дива инспирација. Балкански*.

Синоќа победивме „европски". Секоја чест за Трајковски, ама победивме пред се' во одбрана. Во секој блок, секој клизач, секое лактање, секое задржување време. Крвава, испотена победа. Прекрасна победа.

*Не постојат европски и балкански победи. Ама постојат стереотипи за европски и балкански победи. Ние синоќа ги срушивме.

Кристијан Фидановски, Фејсбук, 25.03.22.

Oд сите можни реформи за подобар политички систем, ние изгледа ќе правиме реформа што ќе го влоши.

Да беше една изборна единица добра идеја, ќе се применуваше насекаде. Државите со една изборна единица се бројат на прсти и не се некои архетипи на демократија (пр. Србија). Држави со една изборна единица, а без изборен праг (како што е предлогот), речиси и да не постојат.

Добар изборен модел подразбира баланс меѓу парламентарна разновидност, стабилно владеење и географска застапеност (меѓудругото). Една изборна единица е (малку) подобра за првото, ама може да биде драстично полоша за другите две.

Во парламент, наместо овој разговор, засега гледам партиско и етничко пазарење.

Кристијан Фидановски, Фејсбук, 22.03.22.

На изборите во Украина неонацистичкиот Обединет фронт свои само 2,15 отсто од гласовите. За илустрација, тоа е помалку од процентот на гласови што неонацистичките движења и крајно десничарски партии ги имаат освоено во речиси сите држави членки на ЕУ. Па дури и нашиве нацисти од Левица на изборите во 2020 година освоија 4,1 отсто од гласовите.

Тоа значи дека Левица има поголемо влијание врз официјалните позиции на Северна Македонија, отколку што имаат украинските нацисти врз оние на Украина. Тоа значи дека инвазијата на Русија поради „нацизмот“ на Азов и на Обединет фронт е помалку оправдана и од ветото на Бугарија поради говорот на омраза од Левица.

Иако, гледано од денешна точка, сè повеќе се чини дека дејствата и на Каракачанов од една и на Апасиев од друга страна, иако спротивни, се управувани од еден и единствен центар на моќ, на кого ужасно не му одговара тоа што Македонија е членка на НАТО и сака да биде дел од ЕУ.

Павле Богоевски, Глобус, 13.03.22.

Во моментов дискусијата за вината на западните левичари како Путинови корисни идиоти е мошне штетна за левицата. Дебатата за потценувањето на рускиот империјализам е важна, но не треба да ја водиме во моменти на интензивни емоции и користејќи морални уцени.

Како последица на инвазијата ќе настапи силен десничарски бран кој во источна и западна Европа ќе го стесни просторот за левицата. Не треба самите да се разоружуваме и да се отвораме за десните напади. Огромното мнозинство на европската левица го осудува рускиот империјализам и јасно им е дека инвазијата води во катастрофа, баш како и американската инвазија на Ирак. На левицата ѝ се потребни офанзивни аргументи. Не смееме да ја прифатиме забраната на дискусијата за соучесништвото на НАТО и постмајданскиот режим во Украина, за причините за неспроведување на договорот од Минск или за односите НАТО и Русија. Тоа ќе значи капитулација, особено на истокот на Европа каде што во ерата на надоаѓачкиот неомакартизам можеби веќе ни основните леви аргументи нема да можеме да ги изнесуваме без обвинението дека сме руски шпиони.

Володимир Ишченко, Новости портал, 10.02.22.