Боли глава

Македонскиот народ ја имал несреќата да се наоѓа и да живее на распетието на оваа најжестока почва во Европа.
(...) Секогаш сум се спротивставувал на незаинтересираноста и на индиферентноста кон нашето наследство.
(...) Историјата не почнува денес, но и не завршува денес.
(...) Македонската приказна е богата со поуки.
(...) Некако се навикнавме вештачки да се отуѓуваме. Итн. Итн.

Илија Димовски, „Дневник“, 05.06.12.

Фала Богу, низ Плоштадот и околу него останаа уште многу мадиња и газиња. Така што, не пречи толку тоа што само Прометеј доби пелена.
Имаме среќа што сè уште никому не му текнало да го спушти коњот врз кој е јавнат Воинот што личи на Александар. Добро е што Букефал е исправен на задните две нозе. Така е поставен што, кога ќе го дигнеме погледот кон него најубаво се гледа за кој кур толку пари ни потрошиле.

Горан Михајловски, новинар; „Вест“,01.06.12

Уживате ли кога слушате дека Вашите братучеди си ги покачуваат крвните зрнца на Малдиви? За Вашето стебло нема да објавите вакво табло? Не Ви доаѓа мачнина Вие да обвинувате дека некој е нечиј братучед? Ако подобро размислам и сосема природно е што не се ставате себе си на табло. Има ли што да напишете? Или би се повторувало: „Прво вработување пратеник или министер“.

Јани Макрадули во текст му се обраќа на Никола Груевски; „Плусинфо“, 31.05.12.

Со последните постапки, претседателот на СДСМ, Бранко Црвенковски, не само што ја деградира професијата политичар, туку и демонстрира една крајно несовесна и неодговорна постапка, која нѐ загрижува и која мора да престане.

Зоран Ставрески, член на ИК на ДПМНЕ; „Плусинфо“, 30.05.12.

Не го обликуваат тие новото лице на градот, туку нè обликуваат нас. Тоа е клучот. Ако тебе не те интересира Фекалоносецот, а те интересира неговиот кур или, дури, ниту тоа, ти си кооптиран во царството на идиотите по силата на законот, твојата волја престанува во моментот кога не си решил да ја урнеш фигурата на Аџиевски или макар да се измочаш како куче што не ја дига едната нога. Оние што дозволуваат во дваесетипрвиот век да им го инфицираат јавниот простор со одвратни, неподносливи, страшни, има ли некој да ни помогне, фонтанички со црквички и крстчиња кои навечер светат и ѝ ја покажуваат авенијата на иднината на стоката македонска, тие се во политичка и во културна смисла, мртви луѓе.

Бранко Тричковски, „Глобус“, 29.05.12.

Откако ќе го кастрираат Прометеј, гордите Македонки ќе можат достоинствено да ги шетаат децата во центарот на Скопје и слободно ќе можат да гледаат лево десно. Нема да има ниту еден пенис што ќе може да им го расипе задоволството. Освен тој на Букефал. А министерката Бети кога ќе оди во Фиренца, нека се подготви за културен шок. Оти Давид на Микеланџело сè уште не е кастриран. Еве едно шест века никому не му текнало да му стави наметка.

Горан Михајловски, „Вест“, 26.05.12.