Раноутрински размислувања

Смената на власт е неопходна.

Прво и основно, затоа што демократијата подразбира постојано менување на властодршците со цел да не се дозволи нивно устоличување, кое вообичаено води кон намалување на одговорното владеење.

Второ, затоа што оваа власт направи многу погрешни потези и создаде систем кој ни од далеку не ги исполнува условите на демократското владеење.

Трето, затоа што во изминатите години граѓаните сè помалку ги остваруваа сопствените потреби и интереси и имаа сè помало влијание на она што се случува во државата.

Меѓутоа, не би требало да се залажуваме дека смената на власта ќе донесе битни промени.

Прво, тие кои што ќе дојдат на власт ќе се соочат со неверојатно сложена ситуација во економијата која може да се разреши само на долги патеки, а граѓаните веќе немаат трпение за тоа и очекуваат резултати овде и сега.

Второ, заради тоа што не се поставени основите на демократското владеење (владеење на правото, партиципација и поделба на власта), а не сум сигурна дека тие кои очигледно ќе се појават како нови властодршци успеаа во годините кога беа опозиција да ги изградат сопствените капацитети за да можат веднаш да пристапат кон вакви промени.

Трето, не се појави некој трет контролен фактор кој ќе го претставува последното тегче на вагата и со својата релативна независност и експертиза ќе оневозможи повторување на грешките.

Четврто, никој не размислува за отфрлање на етницитетот како основа на политичкото дејствување и градење на модел на граѓанството во кој етничката припадност ќе стане прашање на приватната, а не на јавната сфера.

Извор: kvadraturanakrugot.crnaovca.mk

Слика: Банкси