Води љубов со системот!

Случајот со српските анархисти е тажен затоа што ги потенцира двојните стандарди на „системот“. Истиот оној систем против кој се борат анархистите. А сосема нормално е што се затворени и обвинети за меѓународен тероризам. Сепак фрлиле молотов коктел врз туѓа територија со политичка цел.

Џело Биафра, вокалот на Dead Kennedys, има кажано една паметна работа: „Ако сакаш да го смениш системот, никогаш не можеш да се бориш против него. Секогаш ќе губиш. Најдобро е да влезеш во системот и да го измениш од внатре.“ Методите што се користат за промена на нешто се подеднакво важни како мотивите. Ако српскиве анархисти очекувале да бидат потегнати за уво и плеснати по рачето, тогаш заслужуваат да служат тешка робија. Тоа покажува дека или не го познаваат системот што сакаат да го сменат или дека го игнорираат. А проблемот не се решава со игнорирање. Не можеш соодветно да се бориш против некој противник без да ги познаваш неговите силни и слаби страни. Не мора ни Сун Цу да го консултирате, тоа може да ви го каже секој добар играч на компјутерски игри.

Игнорирањето на правилата на „системот“ не е ништо поинакво од заглавеноста во Митска Македонија. Секогаш ме потсетува на Ѕверот од Траал, најкрвожедниот но и најглупавиот ѕвер во галаксијата – ако жртвата не го гледа него, тогаш мисли дека ниту тој не ја гледа неа. Ме потсетува на Инквизицијата којашто сметала дека има право да мачи и убива луѓе затоа што не размислувале како Црквата (или едноставно не им се свиѓале).

Користењето на насилство за постигнување некоја цел – дури и кога е насочено против предмети/згради – не е ништо поинакво од насилството на „верниците“ на 28-ми март годинава. Како што кршењето на „Малага“ и на останатите продавници низ Скопје во 2001 не послужија за ништо друго освен за лечење на фрустрациите на импотентната толпа.

Позната е паролата „Еби го системот!“ И самиот честопати ја имам кажувано кога сум бил доволно пијан или исфрустриран од бирократијата. И одлично делува за луфтирање на вишокот фрустрации. Меѓутоа, за да се смени системот онака како што сакаме, треба да се смени и јазикот што го користиме. „Еби го системот“ треба да еволуира во „Води љубов со системот“.

Проблемот најверојатно потекнува од егоистичната култура на ебачи и ебани. Секој гледа да си го исфура своето, без да обрне внимание на партнерот. И после следува спиење. Само што системот е доволно заебан и ќе ти рипне додека спиеш за да ти „врати“. На системот секогаш му е поголем и има повеќе сила и енергија. Во Југославија луѓе лежеле на робија затоа што помислиле (и кажале некому) дека системот треба да се ебе. Српскиве анархисти тоа ќе го осетат на своја кожа кога ќе ги испратат во затвор – нешто што сигурно ќе се случи. Ланските немири во Грција ништо не направија за промена на системот – имаше само материјална штета и тоа не за државата, туку за оние што функционираат (колку-толку) во рамките на системот. Очигледно беше и во случајот Вејко, Тексас, кога властите во САД направија масакр на ранчот на еден вооружен религиозен култ.

Меѓутоа, ако има водење љубов... Полека се запознава системот, се запознаваат неговите ерогени зони, се истражува секој дел од телото во предиграта која трае и трае... и полека следува трансформација: од релативно инертно тело, системот почнува да се движи, да меша со колковите, да се трие од љубовникот и на крај доживува експлозивен оргазам (без експлозии). Се тресе од задоволство, ама заедно со партнерот, зашто обајцата заедно стигнале до тој момент.

Ако се влезе во системот, како што сугерира Биафра, ќе може полесно да се запознае. Да се откријат неговите ерогени зони и да се искористат за да се доведе до оргазам. Затоа што задоволниот партнер речиси секогаш е подготвен да врати со иста мера.

Користејќи ја истата аналогија, живеењето во комуни (вон „реалноста“/системот) е мастурбација. Да, мастурбацијата е супер – имаш секс со некој што го сакаш, што никогаш нема да ти каже „Не можам сега, ме боли глава“, секогаш си задоволен... само што тоа е врв на себичноста. Не го споделуваш она што имаш да го понудиш со некој друг. Што ќе ти е знаење, интелект, стручност ако не правиш ништо со тие квалитети?

Затоа, заменете ги молотовите коктели со „свеќи“, спрејовите со „масло за масажа“, транспарентите со „поезија“ и водете љубов со системот.

Слики: Antony Micallef