1014 hPa
45 %
18 °C
Скопје - Пет, 26.04.2024 12:59
Небаре се истури гром
ненајавен од молскавица.
Тоа е лудачкиот препад
на црниот ветер
што ни ја отцепува ноќта
од убавото време.
Пред себе тера гламна
што фрла искри
и пишти како заробена жена.
Направен е катран
од пакостите
што веќе ги сторил.
Пијан од бес
што не нè затекнал надвор,
врти, се сучи околу куќата,
грмоти, рика и треска
како пролакомена војска за грабеж
што бара влез во тврдина.
Тој прво сака
да ни ја уништи душата
втерувајќи ни страв в коски,
а потем лесно
да нè претвори во јаглен.
Но ние не се издаваме
ни со светло ни со глас
чекајќи го мигот
кога поради нашиот трпеж
ќе пукне од мака
и ќе се истиши
како најголема гнаса.
Утре ќе чистиме саѓи.