Скопје го надмина годишниот ЕУ лимит за аерозагадување уште во февруари

Еко-активистите од „Скопје Смог Аларм“ информира дека и оваа година Скопје ги надмина годишните дозволени ЕУ граници за аерозагадување уште во февруари, што е показател дека еколошката и здравствена голгота на Скопјани продолжува и во 2018 година.

„Во Европската Унија, дозволената граница за концентрации на ПМ10 честички впросечени во 24 часа е 50 µg/m3. Во ЕУ, дозволениот број на надминувања на лимитите за PM10 честички е 35 денови во една календарска година. На 21 февруари 2018, овие ЕУ лимити се надминати на сите мерни станици во Скопје, освен Миладиновци, Општина Илинден.

Подолу во табелата се дадени вкупниот број на надминувања на 24 часовните гранични вредности (50 µg/m3) за PM10 честичките (броено во календарски денови), на секое мерно место во Скопје за тековната година, заклучно со 21.02.2018.

Потсетуваме дека Светска Банка (2015) проценува дека во Македонија од загадениот воздух годишно гинат 1,350 граѓани, додека Европската агенција за животна средина (2017) проценува дека годишно има до 3,000 смртни случаи заради аерозагадувањето. Тоа значи дека секоја година ни се случува еколошки геноцид, т.е. екоцид.

Апелираме до локалните и централните власти за итни и одржливи мерки за подобрување на воздухот во Скопје и низ цела Македонија. Воздухот во Скопје не смее да се користи како канализација на тешката индустрија и градежната индустрија.

Мерки како дводневен бесплатен превоз се премали за еден од најзагадените градови во светот. Како за пример, Германија планира да воведе целосно бесплатен јавен превоз во пет најзагадени градови. Исто така, Кина ја ангажира армијата за да засади дрвја, најмногу во околината на главниот град Пекинг, и привремено затвори голем број на фабрики со цел да се намали загадувањето. Париз неколку пати воведе „ден без автомобили“ во центарот на градот“, стои во соопштението од Заедница на еко-активисти „Скопје Смог Аларм“

Активистите за овие податоци ги известиле и Владата; Министерство за животна средина; Делегација на ЕУ во Македонија; Европска агенција за животна средина; Канцеларија на ОН во Македонија: Амбасадите на САД, Германија, Велика Британија и Холандија.