Војна

Големи црни жаби детските играчки ги јадат. Под тешките перници децата главите ги кријат. Од книги со сказни на плоштадот гори клада. По одраните улици пци без кожа вијат.

Во дворот каллив коњите ги убиваат со сатар. Нови букви додава крвта врз скинатиот весник. Млитавите кожи потоа по цела ноќ се клатат како мртви лилјаци пред прозорците тесни.

Децата саноќ сонуваат како врел и леплив полжав им минува врз усните и челата потни.
Од воените складови се шири насекаде пожар. Во зоолошката градина горат животните.

Пред вратата тешки вреќи или тешки тела влечат некои луѓе што не ги познава никој.
Над децата со испотени чела
се наведнуваат жени на кои не им се гледа ликот.

Зората е модра давеничка извлечена од река. Високо во небото гавраните грачат.
Денот е како и лебот: невкусен и глекав. Врз коњите без глава голи деца плачат.