Боли глава

Станавме земја без критериуми, затоа не’ нема подалеку од сопствените граници – немаме со што да конкурираме. Под многу нивоа сме на државен план, а алтернативата, која носи слободна мисла , се чува во затвор, под контрола од самата држава. Некомпетентни луѓе одлучуваат за нашата судбина, а народот ги прима нивните одлуки здраво за готово. Незнаењето и простотилукот во комбинација со партиската послушност се синоним за успех. Ентузијазамот е со одамна изминат рок. Тие што сеуште имаат сила и надеж – емигрираат. На останатите им збогтиса од лажги и си го прифатија камшикот на ДПМНЕ како судбина. Останаа поединци да бараат парче слобода и надеж. Дел од нив, со време, веројатно ќе замине. Полека стануваме „музеј земја“ – последен проект на владата на РМ.
Синоличка Трпкова;Фејсбук / Либертас, 12.08.13.

Дали сите млади, средовечни и стари што ја напуштија осиромашента земја, отидоа во белиот свет по парче леб или некои отидоа со парите што „ги спечалија“ во матната транзиција. А ние овде ќе си ги вадиме очите, ќе се мразиме ќе си „пуштаме крв“. Тоа се важни прашања кои заслужуваат барем да се отворат ако ништо друго. Каде отидоа, исчезнаа парите.
Аљоша Симјановски, колумнист и режисер; Утрински весник, 12.08.13.

Според тоа, меѓу еден ординерен шутрак (се мисли на Саше Ивановски, уредник на Мактел - заб. Окно) кој се увлекуе у дупе таму каде што бара пари и една разгоропадена Мирка, јас без размислување би ја избрал Мирка. И не само тоа. Еве, дури и во својство на обичен човек, новинар кој има не повеќе од пристојно образование и 1.200 грама здрав мозок во главата, без оглед и наспроти сите политички околности, симпатии и антипатии, без оглед на сите мои полемики со неа, јас за свој собеседник и омилен „непријател“, секогаш би ја избрал интелигентната и начитана Мирка, а никако оној непоисмењаковиќ кој се однесува ко шлакнат со цигла у глава. Тоа, едноставно, е прашање на ментална хигиена!
Бранко Героски на Фејсбук; 13.08.13.

Ја молам Билјана Беличанец, мојата колешка, бидејќи како жител на Кисела Вода спаѓам под нејзина јурисдикција, да ми пушти светло на улица Георги Димитров. Билјана, замисли како би ти било да си на сцена, а да не ти пуштат светло кај што глумиш. Е мене ми е така! Се јавував кај некој таму во општина ама они ме заебаваат. Ај кажи им дека тоа не е убаво и пушти ми светло.
Александар Поповски, режисер, на Фејсбук ја моли градоначалничката на „Кисела вода“; 11.08.13.

И конечно, јас лично ве повикувам сите да си го поставиме прашањето зошто оваа власт со години тврди дека нема да прифати било каква промена на уставното име (по цена Македонија, наместо кон Запад, да се сврти кон Кина и кон Индија, кон Куба и кон Венецуела), а ваму премиерот Никола Груевски јавно се нуди лично да преговара и да договори заемно прифатливо решение, кое неизбежно ќе биде едно компромисно име. Зошто нѐ лажеа цели седум години?
Бранко Героски, Плус инфо, 10.08.13.

Денес псевдоинтелектуалците од Македонија оваа одушевеност би ја стуткале во феноменот „антиквизација“. Но нивните неологизми и оксиморони, остануваат како растурени лушпи од семки по трибините на стадионот, каде се одвивал големиот натпревар на титаните.
Александар Станковски, идеолог на антиквизацијата и телесна гарда на малиот архитект, пардон - титан; Утрински весник, 06.08.13.