Боли глава

Македонија денеска се препознава како среќна театарска земја.
Елизабета Kанческа-Милевска, министерка за култура; „Дневник“, 31,05.13.

Значи народе, чекајте позитивна политичка плима, после долга осека со неспособната и раскарана опозициска СДС доаѓаат убави денови, и за власта и за нас, трета опција, ви реков ГРОМ КУКАВИЦА и се разбира ЦЕЦА. Предвидувам дека со нив и Грујо и ние ќе РАСЦВЕТАМЕ, а Али и Тачи ќе гледаат, и ќе им течат лиги. Ќе нема уцена за тендери, провизии, коруптивни зделки, оти чинам дури тогаш се ќе завршува во новата зграда која јас еве ја крстив ТРИ ВО ЕДНО, односно и власт и опозиција под исти кров во хотелот на ЦЕЦА. Дотогаш, до тоа благостање, да се стрпиме, остана уште малку, кај и да е овие раскараниве ќе го изберат новиот БЦ, кукавицата ќе пропее, а Стевчо ќе продолжи со нему омилената НИКО НАМ НИШТА НЕМОЖЕ, ЈАЧИ СМО ОД СУДБИНЕ. Таа него му го топли срцето, оваа ГРОМОТ чинам е повеќе за уметнички дојам на идната коалиција ТРИ ВО ЕДНО или поедноставно широк социјалистички фронт на чело со ВОЖДОТ спонзориран од ЦЕЦА.
Ацо Кабранов, Либертас, 31.05.13.

Која е најдолга река во светот? Заокружи го точниот одговор: а) Вардар б) Дунав в) Нил г) Драгор. Мислам, стварно треба да си Ајнштајн да одговориш на ваква загатка. (...) Како се вика машки полов орган на латински? Заокружи го точниот одговор: а) Денис б) Тенис в) Пенис. Таков е тој систем. Заебан. Си бара знаење. Гледам, млади со ај-кју тринаесет, доволно голем коефициент колку да не какаат дома на тепих, станаа доктори на науки на дваесетитри години, а уште азбуката на Кирил не ја знаат до крај.
Сашо Тасевски, „Мактел“, 28.05.13.

Замагленото сведоштво дека Грците ја примиле писменоста од некакви загадочни малоазиски или дури северноафрикански Феникијци ни кажува дека всушност се работи за балканските Сло-Вени, т.е. за Јужните Венети. Додека во глаголицата местото на буквата го дава нејзиниот број на вредност, во грчкиот алфабет и во кириличната азбука тоа не е така. Словенската писменост е постара од грчката, односно Словените се постар и поцивилизиран народ од Елините.
Милош Линдро, поет; „Нова Македонија“, 23.05.13.

Ова е нечуено! Само пе..ри! Оваа манифестација ја организираат истите оние кои ги организираат геј парадите ширум светот. Јас досега слушав сè и сешто, но ова е прв пат со свои очи да се уверам штo се случува со ова некогаш прекрасно музичко натпреварување. Не е ни чудо што не поминавме, бидејќи се гледа кој овде оди понатаму. Мојот колега Лозано не смееше да излезе од хотелот, а камо ли да отиде до Евроклубот. Таму веднаш го штипкаа за задникот.
Есма Реџепова, српски „Курир“, 21.05.13.

Не ја прифаќам констатацијата дека во Македонија тешко може да се најде работно место, туку е проблем да се ангажираат дел од луѓето да прифатат да бидат работно ангажирани. Факт е дека голем број граѓани одбиваат и пребираат работни места.
Спиро Ристовски, непребирлив млад човек со министерска работа; НоваТв