Боли глава

Ние тука дискутираме и правиме стандарди, а забораваме дека ние сме, да не претерам, најмалку шест-седум генерации зад западните демократии, од аспект на цивилизациско, културолошко, политичко и економско ниво. Ние не сме спремни да го следиме примерот на западните демократии.

Љупчо Шврговски, невидливиот јавен обвинител на држава која ни минимално не ги исполнува неговите „цивилизациски нивоа“; дневен „Фокус“, 15.12.11.

Во западните земји (Британија предводи), не само Аристотел, туку и Шекспир и Пикасо се технолошки вишок.

Билјана Ванковска, „Нова Македонија“, 12.12.11.

Замислете си, кога секој ден, пред барокната зграда ќе запре оној големион камион на „Водовод и канализација“ што меѓу вработените го нарекуваат „гомнарката“, па од него ќе излезе Пеце или Љутви, со дневниот налог в рака, од тукушто завршената интервенција на затнатата фекална канализација на Илинденска бб. Со чизми до колена, па кога ќе загази по тоа мермерот, ќе остави иста трага како владата на Груевски со шестгодишно владеење во Македонија. А можеби мајсторите пак ќе си останат понастрана во некоја шупа во Бутел, кај гробиштата, а во 5000 мермерни квадрати ќе се шират лепачите на плакати на ВМРО ДПМНЕ?

Стевче Јакимовски, дневен „Фокус“, 10-11.12.11.

Подмладокот на УМС на ВМРО ДПМНЕ потпиша меморандум за соработка со здружението на слепи лица, а документот беше оверен на кирилично и на броево писмо.

Диме Спасов, претседател на УМС и државен секретар во министерство за правда; дневен „Фокус“, 06.12.11.

Истите тие новинари нè отекоа со муабетот за декриминализација на клеветата, што во превод значи, онака уличарски и народски по мое, бараат легално да серат против кого сакаат, да можат некому и ден да затемнат, и живот да зацрнат, и кариера да упропастат, ама за тоа да не преземаат никаква одговорност пред никого, бараат да им биде дозволено без никаква пречка да лажат и манипулираат, да спинуваат и одработуваат, иако сите знаеме, нивните дела тоа досега го покажале, најголемиот дел од нив го блебетаат само она што партијата-миленичка го побарала, газдата-божество го наредил, па газето што им зинало за кеш го одработило.

Александар Русјаков, режимски хуморист и (ко)автор на некои од највалканите и најподлите прилози во историјата на медиумите во Македонија; „Нова Македонија“, 03.12.11.

Ако Љубе Бошкоски е осуден на седум години; ако заштитениот сведок е гркоман од селото Бапчор во Егејска Македонија; ако тој гркоман е во одлични односи со грчката држава и тајните служби; ако тој гркоман беше идејниот автор на целата операција со продажба на „Окта“; ако тој гркоман е денес клучен играч на македонската влада во оваа тешка казна за Љубе; ако Љубе беше најсериозен критичар на владеењето на ВМРО-ДПМНЕ - тогаш, драги пријатели, дали тој гркоман, кој е во одлични односи со грчката држава и со грчките служби, би ѝ бил од помош и услуга на владата на ВМРО-ДПМНЕ, ако пред тоа не добиел согласност од своите газди во Грција?! И која е, тогаш, најголемата грчка инвестиција во Македонија? Сегашната влада на РМ?

Васко Ефтов на Фејсбук; дневен „Фокус“, 30.11.11.