Протест: Стоп за загадувањето во Скопје

Граѓаните на Аеродром, Лисиче, Карпош, Центар, Чаир, Гази Баба, на град Скопје воопшто, ќе се соберат на протест со цел да го изразат својот револт од алармантното аерозагадување.

Настанот е закажан за недела, 20.12.2015 година, во 12 часот на пладне, пред просториите на Град Скопје (Градски парк).

Ко-организатори на собирот се неформалните (grassroots) граѓански иницијативи „Skopje Smog Alarm“ и „Заедно за заштита на зеленилото во Карпош“, со поддршка на мноштво граѓански организации и иницијативи. Официјалниот постер за најавениот постер е #НеСеДише, со цел да се зголеми свесноста кај граѓаните околу опасноста од аерозагадувањето. 

Статистиките за ризиците и последиците од аерозагадувањето во Македонија се поразителни:

1. Годишно во Македонија се губат околу 1.350 животи (скоро четири животи дневно) и се губат илјадници продуктивни денови како резултат на загадувањето на воздухот со ситни честички. (извор: Светска банка)

2. Во 2014 година, бројот на дозволени надминувања на дневната гранична вредност на ПМ10 честички е надминат во сите мерни единици во републиката, освен Лазарополе. (извор: Министерство за животна средина и просторно планирање)

3. Скопски „шампиони“ според аерозагадување за 2014 година се: Лисиче (Аеродром) со над 200 денови надмината среднодневна гранична вредност на загадување со ПМ10 честички, потоа Центар со преку 150 денови, Карпош со над 130 денови, и Гази Баба со над 120 денови. (извор: Министерство за животна средина и просторно планирање)

На собирот ќе се обратат еко-активисти, претставници од граѓански организации кои делуваат на полето на животна средина и влијателни јавни личности.

Поддржано од: Центар за истражување и информирање „Еко-свест“; Младинска организација „Go Green“; Здружение на граѓани “За нас се работи“; Граѓанска иницијатива „Ќе дишеме или ќе издишеме“; Здружение за култура и уметност; Факултет за работи што не се учат - ФРУ; АКТО фестивал за современа уметност; Здружение Плоштад Слобода; Граѓанска инцијатива Го сакам ГТЦ; Граѓанска акција "Заслужуваме подобро!".