1015 hPa
64 %
18 °C
Скопје - Вто, 14.05.2024 14:27
Вечерва (25 декември) со почеток во 20 часот, во Кинотека на Македонија ќе се одржи премиерната изведба на монодрамата „Џанки“ (Ајде да не зборуваме за очајот...)
Шокантен текст и режија на Југослав Петровски, кој по долги години „цензура“, се враќа на театарската сцена со продорен авторски крик за – дрогата и пеколот што ја носи таа, за заблудите, измамите, етикетирањата .... за многуте влезови во тој пекол и титанската борба при излегување од тоа пеколно царство. Но секако дека тоа е само иницијална капсула, драматуршка ударна игла која ни отвора цел еден свет на ерозија на светот во кој живееме, и ерозија на самиот човек било каде во оваа време – невреме.
„Кога ќе си ја продадеш душата на ѓаволот, тогаш место кај што била душата, тоа место, не може да се исполни со ништо, останува – празнина... А таа празнина, пече, боли проклетото; и ти се обидуваш да ја наполниш така настанатата црна дупка со било што ... со - дрога, алхохол, похота и порок, со сите сладострастија на Содома и Гомора, но колку и да сипуваш внатре таа е сè попразна, а човекот кој си ја „продал душата“ е во сè поголем пеколен хаос: при ситост - да неможе да се засити!“, вели авторот Петровски.
Оваа монодрама е инспирирана и преставува спој на неколку вистински животни исповеди. Трогателни, хаотични, приказни кој можел да ги смисли и спроведе во дело само ѓаволот лично. Во монодрамата се говори сурово, се става 'живо парче месо' пред публиката, не се морализира, и ништо не се кажува во бели ракавици. Во оваа монодрама животот е онаков каков што навистина е.
Се работи за независен проект во изведба на актерот Горан Ников, по текст и режија на Југослав Петровски.
Организатор и глас: Маријана Миа Петровска
Дизајнот на плакатот и сценографијата се на Мето Кузманов.