1013 hPa
43 %
19 °C
Скопје - Пет, 26.04.2024 15:59
Една принцеза
крај еден поток
сретнала жабок.
„Поздрав длабок
за тебе, жабок!“,
рекла принцезата.
„Ми прорече дворскиот пророк:
’За живот достоен и без порок
ти треба жабок со глас на фагот’.“
Жабокот одеднаш - скок!
А принцезата - во шок!
И извикал жабокот: „Јок!“
Ама храбра е принцезата:
„Ми тече рок, жабок.
Фрлен ми е урок.“
„Принцезо! Не ти треба
жабок со глас на фагот
туку од жабок - сок!“
„Молам?!“, прашала принцезата.
А жабокот рекол: „За пофина плот
и подобар крвоток - сок од жабок.“
„Молам?!“, пак рекла принцезата.
„Принцезо, стварно си оток!
Не ти треба од жабок сок туку - цмок!“
„Мечка страв...“, помислила принцезата
- и го бакнала жабокот! И осетила, ох!:
како исчезнува психолошкиот блок!
На крајот се слушнал и фагот
и долго во ноќта играле фокстрот и рок
и твист, таа принцеза и тој жабок.
Слики: Марио Капалди