Боли глава

Урбанизмот е жива материја. Да се стопира градењето, тоа е како да ги затвориш породилиштата.

Стевче Јакимовски, Канал 5, 15.08.24.

Ревизорката која не е баш ревизорка била сменета, ама само привремено. Ќе сме почекале да го добие потребниот сертификат.

„Таа ќе биде привремено заменета со друг кадар од нашите редови додека ја заврши својата обврска со добивање на сертификатот“, велат од „Вреди“.

Боже, боже!

Абре госпожа, фатена си во обид да се наместиш односно да те наместат на позиција за која немаш квалификации. Белким во најмала мера срамота е да те чека сигурно работно место додека ти се „доквалификуваш”…

Па ајде да ја почекаме ќерка ми, ако не, ќе порасне, ќе заврши, ќе стане ревизорка, ако била за чекање работата.
Ќе сме ја почекале да ја заврши својата обврска…

Неверојатно!

Катарина Синадиновска, Фејсбук, 10.08.24.

Ироничниот и дрзок спектакл на Отворањето на Олимписките игри во Париз е далеку од стерилната и недуховита политичка коректност. Церемонијата не само што ја претстави Европа во нејзината најдобра форма; таа го потсети светот дека само во Европа е можна таква церемонија. Беше глобална и мултикултурна, но пораката беше пренесена од гледна точка на француската престолнина, најголемиот град во светот. Тоа беше порака на надеж, замислување на свет со голема различност, без место за војна и омраза.

Спротивно на тоа е визијата понудена од десничарскиот руски политички филозоф Александар Дугин во неодамнешното интервју со бразилскиот новинар Пепе Ескобар. За Дугин, Европа сега е ирелевантна, гнила градина заштитена со висок ѕид. Единствениот избор е меѓу глобалистичката длабока држава на Америка и мирниот нов светски поредок на суверени држави. Би било мирно, сугерира Дугин, оти Русија би им дистрибуирала нуклеарно оружје на сите земји во развој, така што опасноста од меѓусебно сигурно уништување би важела насекаде.

Борбата меѓу меѓу американската длабока држава и Доналд Трамп, овогодинешните претседателски избори во САД, според Дугин, ќе биде судбоносна за човештвото. Ако Трамп победи, можна е деескалација; ако победат демократите, одиме кон глобална војна и крај на човештвото.

Спротивно на она што мислат луѓето како Орбан и Дугин, пораката на Тома Жоли е длабоко етичка. Таа им шепоти на конзервативните националисти: Погледнете ја церемонијата повнимателно и засрамете се од тоа што сте.

Славој Жижек, Project Syndicate, 08.08.24.

Не мора на сите да им се допаѓа отворањето на ОИ. Прашање на вкус. Но да се кука заради сквернавање на „Тајната вечера“ насликана од Леонардо Да Винчи, кој бил геј и својот љубовник го земал како модел за Исус - е небулозно!

Александра Ќурчиќ, Фејсбук, 30.07.24.

„И тие така правеа.”

Се изнаслушавме со децении. Едни, па други. Повеќе или помалку. Во една или друга област. Ама, генерално - и тие така правеа.

Кога ова е факт - ја уништува критиката, оти таа станува некредибилна и смешна.

Кога ова се користи како алиби - ја уништува смислата, оти поентата е, нели, овојпат да биде демек поинаку. Без кредибилна критика и без капацитет за вистински поинаку. Е таму сме. Постојано. Па, нема пострашно.

Ни требаат луѓе кои така никогаш НЕ правеле, за сега да им држи зборот. И луѓе кои ќе се срамат да помислат да се споредуваат со тие кои така правеле, а уште помалку на легитимна критика да одговараат со напад за тие кои така правеле.

И не, не ми велете дека овие луѓе ги нема!

Тие можеби сакаат овде да ги нема, да, ама тоа е друго дваесет, што викаше баба ми.

Катарина Синадиновска, Фејсбук, 22.07.24.

Ветив дека ќе бидам секогаш искрена пред граѓаните. Затекнавме состојба која значи држава во хаос и долгови, список на желби наместо развој. Економијата е во клиничка смрт.

Гордана Димитриеска Кочоска, министерка за финансии; прес конференција, 17.07.24.