Боли глава

Се сеќавате ли кога во средината на 80-тите години се појавија првите кафулиња во Скопје, па загрижените мајки нè опоменуваа: „Синко, пази кога искачаш по това кафиќите, се зборуе по комшии дека тураат дрога во кока-колата“? Јас оттогаш сум бил во стотици скопски кафулиња, но не сум налетал на тоа место во кое ставаат дрога. Арно ама, македонскиот Брејвик, Никола Гелевски, се чини го има најдено. На таквите случаи не им помага дискусија, туку итна хоспитализација!

Дарко Митревски одговара на критиката на Никола Гелевски; „Република“, 14.09.12.

А потоа, ааа потоа! Ќе ни остане една концептуална уметничка акција, сите со француските клучеви и растурај тоа спомениците!

Љубомир Д. Фрчкоски, „Фокус“, 11.09.12.

Сепак, ако пронајдат атавистичка сила, нова колективна енергија, Македонците најпрво треба да формираат консензус за излезните решенија. Тие би можеле да бидат, на пример – давање државјанство по род на сите генерации Македонци во светот и нивно попишување (тогаш ние Македонците би биле над 95 проценти во Македонија) односно физичко враќање на иселениците Македонци, етапно легално поништување на „рамковниот договор“ (со аргумент дека е донесен под воена закана од терористи односно дека никој никогаш според тогашниот Устав не може да потпише капитулација), и стратегиски сојуз со Србија, Русија, можеби и Бугарија, а особено воено-полициски договор за заедничка (и внатрешна и надворешна) одбранбена политика.

Тони Науновски, „Дневник“, 11.09.12.

И за сето тоа време премиерот престојува по луксузни хотели, се релаксира на Флорида, наплаќа по 100 долари да го слушаат. Единствен напор му е што аплаудира на конвенции, како кај републиканците, така и кај демократите. А да дуваше и свеќи за роденден, петти. Чудно? Ќерка ми кога полнеше две години имаше две свеќички на тортата, хм?

Јани Макрадули, „Плусинфо“, 05.09.12.

Настрана опседнатоста со Alte Balkanische Kitsch на архитектонска мегаломанија и коњокласицизмот како потсвесна метафора за јавнатиот народ, новоапсолутистите и не се одликуваат со некоја посебна мас-културна иконографија. Се' што е способна оваа авторитарна власт да измисли се периодичните спин-оф верзии на црнокошулаштво, трапаво пропагирање на конрададенауровски постнационалсоцијализам и медиумските гебелси во криза на идентитет помеѓу Африм и Борат. Во пакет со јужно тажни копии на домашниот Вагнер-болшевизам во ликот на грст скржави млади студенти облечени како антички Александар и Хефастион и нивните партизански наследници Мирко и Славко.

Арсим Зеколи, „Утрински весник“, 02.09.12.

Новинарот: Велите Македонија е рај за инвестиции, ниски даноци, договори со сите земји на европскиот континент, што тогаш Канада може да ви понуди вам?
Груевски: Имаме големи инвеститори, познати брендови од Германија, Америка, Британија, Русија…. но немаме од Канада. Затоа сме тука.

Никола Груевски, интервју за канадската BNN; 30.08.12.