„Home Before Dark” - изложба на фотографии на Софија Чотирбок

Во Националната Галерија, објект „Мала Станица”, на 24 февруари (петок), ќе биде отворена изложбата на фотографии насловена „Дома пред да се стемни” (Home Before Dark) на украинската визуелна уметница Софија Чотирбок.

„Идејата за изложбата „Дома пред да се стемни” (Home Before Dark) произлегува од биографска епизода на уметницата поврзана со барањето за италијанско државјанство што би значело откажување од нејзиното родно државјанство, украинското.

Овој настан доведе до повеќеслојно истражување фокусирано на индивидуалната и колективната дефиниција на себството во време кога неговите географски и временски основи стануваат сѐ понеизвесни.
Почнувајќи од февруари 2020 година, серијата патувања во Украина го означија креативниот процес на повторно откривање на идентитетот и припадноста во постсоветскиот контекст, чии граници и дефиниции сега се уште понејасни и покомплексни од кога било.

Почетната точка на уметничкиот процес е архива, место на сеќавање по дефиниција, овде материјализирано во chruščëvka (советски стан) и предметите и сликите што ги содржи, симболични реликвии кои истовремено се и познати и туѓи. Токму во познатите текстури на таписериите и семејните фотографии се артикулира истражувањето со тоа што ги прави видливи, без да ги пополни, празнините на меморијата преку низа од мимикрија, бришење и прикривање.

Сликите, чии јазици комбинираат автопортретирање, инсценирана фотографија, колаж и архивско истражување, копаат под симболичните хегемонии кои ги обликуваат колективните идентитети и ја откриваат, без да дадат дефинитивно решение, носталгијата на минатото изгубено во слоевите на тајната.

Софија Чотирбок, родена на 21 април, 1991 година е украинска визуелна уметница. Таа живее во Милано, каде што дипломирала фотографија на Cfp Bauer во 2019 година. Нејзиното истражување се фокусира на темата на идентитетот во постсоветското општество, миграцијата и архивата како интимна и домашна меморија, трансформирана во универзална човечка материја преку фотографија, видео и ткаенина. Добитничка е на бројни стипендии во Италија и во Украина. Нејзините дела се изложени на големи меѓународни фестивали и музеи, вклучително Saarlandmuseum - Moderne Galerie (2023), Triennale Milano (2021), Paris Photo Off (2022), Odesa Photo Days (2021), Mana Contemporary (Чикаго, 2019). Во 2023 година беше финалист на Giovane Fotografia Italiana #10 и ја имаше нејзината прва самостојна изложба во Битола, Македонија.

Оваа изложба е во контекст на тековната воена агресија на Русија против Украина, и ќе се реализира како поддршка на уметничкиот израз и издржливост на Софија Чотирбок во време на конфликт.