Фотографии од вториот ден на „Друга приказна“ #6

На вториот ден на шестиот фестивал Друга приказна, во Пионерскиот дом „Карпош“ во Скопје се случија неколку интересни настани, повеќето наменети за деца.

Низ мала изложба и читање беше претставена сликовницата „Страшна ноќ“ од Славко Јаневски и Наташа Андонова.

Беа претставени и сите четири досегашни изданија на едицијата сликовници, „Старо купувам“. Посебно се зборуваше за најновата, „Македонски календар“, од Владимир Шопов и Инес Ефремова, а Елена Митреска прочита расказ од „Розови слонови“ на Влада Урошевиќ и Ѓорѓе Јовановиќ. Четвртата книга во таа едиција се вика „Споменик од песни“ на авторите Видое Подгорец и Ване Костуранов.

Се одржа и интересен разговор за илустрацијата во Македонија, на кој учествуваа упатени луѓе: илустраторките Душица Димитровска и Инес Ефремова, покренувачката на детскиот фестивал „Литера“ Софија Семенпеева, професорот по графички дизајн Ладислав Цветковски и уредникот на „Темплум“ Никола Гелевски.

Вечерта заврши со видео проекција на три Темплум видео сликовници: „Мојот чадор може да е и балон“, „Морис и фустанот со боја на мандарина“ и „Мачки и глувци наопачки“.

Видео продукцијата на трите сликовници ја направи Кети Талевска, звукот го сними Ивица Јанкуловски, музиката ја направи Ставро Ангелаков, анимациите Александар Јосифовски, а сликовниците ги читаа Талија Настова, Никола Настески и Никола Гелевски.

Убавата атмосфера во Пионерскиот дом беше збогатена со стари музички остварувања за деца на композиторот Димитрије Бужаровски и писателот Русомир Богдановски.

Фестивалот е поддржан од Град Скопје.

Фотографии: Дарин Ангеловски