ДРУГА ПРИКАЗНА: Книжевноста како игра и работилници за пара вести

Во рамки на фестивалот за мали фикции ДРУГА ПРИКАЗНА, (28-30 јуни, Скопје, Парк на франкофонијата), ќе се одржaт и две работилници.

Првата работилница е за пара вести, форма која одамна е популарна во светот, а последниве години достигна огромна популарност како во регионот, така и во Македонија.

Целта на работилницата е учесниците да се запознаат со различните аспекти оваа сатирична, паракнижевна форма - хумористичната, забавната, но и активистичката страна на пара вестите.

На работилницата, која ќе ја води Иван Шопов, учесниците ќе бидат запознаени со најзначајните примери на пара вести од светот, регионот и од Македонија, а потоа и самите ќе пишуваат пара вести.

* * *

Втората работилница, Книжевноста како игра, ќе биде посветена на неколку алтернативни, експериментални и игриви начини на креативно пишување – колективно создавање книжевен текст преку надреалистичка игра (т.н. прекрасен труп), пишување со cut up техника - сечкање зборови од некнижевни текстови и нивно комбинирање во книжевна форма, како и други начини на креативно пишување преку игра.

Учесниците ќе бидат запознаени со основите на овие книжевни техники и начини за пишување, а потоа и самите ќе учествуваат во пишување „прекрасен труп“ и cut up текстови.

Оваа работилница ќе ја водат Никола Гелевски, Драган Протиќ и Владимир Лукаш.

* * *

Заинтересираните за учество на двете работилници можат да се пријават на мејлот drugaprikazna@gmail.com

и треба да ги испратат следните информации:

-Име и презиме
-Возраст
-Телефонски број за контакт

Работилницата за пара вести ќе се одржи на 29 јуни, во ГЕМ Клуб (Стара чаршија, над Менада), во 15 часот, а работилницата „Книжевноста како игра“ ќе се одржи на 30 јуни, на истата локација во 15 часот.

Рокот за пријавување е 27 јуни.

* * *

Резултатите од работилниците ќе бидат претставени на Фејсбук страницата на фестивалот ДРУГА ПРИКАЗНА, како и на порталот Окно.