Пост скриптум

17.05.2022 10:40

Кој да смогне да го каже
болот светов што го кине?
Зар поетот! Та, тој маж е
што се раѓа и што гине,

што се вљубува, што пати,
преполн лудости и страсти,
сè бербати и сè злати,
предрасуди бројни пласти.

Не е ничие тој знае
в раце секој да го валка.
Молчалив и често сам е.
Како ветрогон се талка.

Знае, никој не ги брише
гревовите забранети –
Знае, црно му се пише
и на веков дваесетти!

Песната им носи пари
на мнозина параметри
а сегашноста е жена
од поети недопрена!

На злото со зло се враќа,
подлостите цутат, боже,
зар пак веков наш се траќа
од зла болест изнеможен?

Отчовечени се дните
и врколен овој свет е.
Виновници штом сме сите
ќе се страда, запомнете!

Врз убавото се плука,
врз добрината се гази –
та, поетот кај е тука
зло да презре, зло да мрази…

И да праша громко, гласно
дали мрачно денес сè е,
и да викне полнострасно:
Се лажете! Не е! Не е!

Пустозборци, сештојади,
чиста реч пак ќе се кова,
песната пак пат ќе гради
кон среќата човекова.

 

Слични содржини

нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна

ОкоБоли главаВицФото