1015 hPa
64 %
18 °C
Скопје - Вто, 14.05.2024 14:27
Седеа на фонтаната, со нозете брцнати внатре. Си шлапкаа. Се прскаа. Дојде полиција. Ги избрка.
– Ќе се вратиме?
– Ајде! – викна таа радосно. Се вратија, си седнаа и си ги ставија нозете во водата. Не им студеше.
– Прсни ме! – му викаше таа, а тој ја прскаше. Обожаваше да ја гледа водена.
– Уште! Уште! – викаше со детски глас. Не беше дете.
Дојде полиција. Ги избрка.
– Да се вратиме! Сакаш? – го праша, а капки ѝ течеа по челото, по вратот, градите, колената... Беше наводенета.
– Сакам! Ајде! – се вратија и ги бутнаа нозете во водата. Плескаа по неа. Ја „тепаа“. Ѝ правеа пена.
– Посилно! Посилно! – ѝ викаше.
– Види ја, стана како сапуница! – меурчиња летаа околу нив.
Дојде полиција и ги избрка.
– Ќе се вратиме, нели? – го праша.
– Да, мора да се вратиме. Тоа е наша вода...
Се вратија. Ги натопија нозете. Си ги преплетуваа под водата, па се прскаа, се наводенија и двајцата. Се прскаа и со рацете. Беа многу водени.
Дојде полиција. Сакаа да ги избркаат.
Тие се нурнаа и излегоа во средината на фонтаната.
Скаменети. Од нив течеше вода.
Слика: Jana Brike
Извор: Анета Попова, Најкратки раскази (Антолог, 2009)